काठमाडौं- हर्क साम्पाङ नेतृत्वको श्रम संस्कृति पार्टीका उपाध्यक्ष विश्वक्रान्ति, देवराजले परिचित राजकुमार तामाङ लामालाई प्रहरीले काठमाडौंबाट पक्राउ गरेको छ ।

नेपाल प्रहरीको केन्द्रीय अनुसन्धान ब्युरो(सीआईबी) को टोलीले मंगलबार धनकुटाको पाख्रीबास नगरपालिका–९ का स्थायी बासिन्दा उनलाई काठमाडौंको कपनबाट पक्राउ गरेर हिरासतमा लिएको हो ।

लामा काठमाडौंको बबरमहलमा भएको बम विस्फोटका मुख्य नाइकेका रुपमा चर्चित छन् । बबरमहलस्थित नेपाल आयल निगमको गेटमा २०६८ फागुन १५ गते भएको बम विस्फोटमा परेर तीन जनाले ज्यान गुमाएका थिए। उनी उक्त मुद्दामा सजाय भुक्तान गरी उनी २०७६ सालको प्रजातन्त्र दिवसमा बाँकी सजाय माफी पाएर छुटेका थिए ।

लामा जेलबाट पाँचथरमा विस्फोटक पदार्थसम्बन्धी अर्को मुद्दा दर्ता भएको थियो। उक्त मुद्दामा फरार देखिएका उनलाई सीआईबीको टोलीले पक्राउ गरेर पाँचथर पठाउन लागेको छ।

धरानका मेयर हर्कले गठन गरेको श्रम संस्कृति पार्टीका उपाध्यक्ष उनी राजनीतिमा सक्रिय थिए ।