काठमाडौं – बलिउड नायक अमिर खान र निर्देशक राजकुमार हिरानीको कामको विशेषता मिल्छ । दुवै सन्देशमूलक फिल्ममा काम गर्ने रुचि राख्छन् ।

‘पीके’ र ‘थ्री इडियट्स’ जस्ता फिल्म यसका उदाहरण हुन् । सन्देशमूलक साथै व्यवसायिक हुने भएकाले बलिउडमा यी दुईका फिल्मले विशेष स्थान पाउँछन् ।

अझ यी दुईको सहकार्यलाई थप विशेष रूपमा हेर्ने गरिन्छ । अर्थात् यी दुईको सहकार्य हुँदा विशेष फिल्म बन्छ भन्ने आम बुझाइ छ । विगतले पनि त्यही भन्छ । यी दुईको पछिल्लो सहकार्य फिल्म ‘पीके’मा देखिएको थियो । यस फिल्मको शीर्ष भूमिकामा अमिर र निर्देशकको जिम्मेवारीमा हिरानी थिए ।

अब फेरि बलिउडमा यी दुईको सहकार्यको चर्चा चलेको छ । बलिउडका लेजेन्ड लेखक, निर्देशक तथा निर्माता दादासाहेब फाल्केको ‘बायोपिक’ का लागि यी दुईले सहकार्य गर्ने भएका हुन् ।

११ वर्षपछि यी दुईले यस फिल्ममा सहकार्य गर्न लागेका हुन् । भारतीय मिडिया पिंकभिल्लाका अनुसार यी दुईबीच उक्त बायोपिकमा सहकार्य गर्ने सहमति भइसकेको छ । सन् २०२६ मा फिल्मको छायाङ्कन सुरु हुने बुझिएको छ ।

हिरानी फिल्म ‘डंकी’ पछि नयाँ प्रोजेक्ट सुरु गर्ने सोचमा छन् । यता अमिर आफ्नो महत्वकांक्षी फिल्म ‘सितारे जमिनर पर’ को काममा व्यस्त छन् । जुन २० मा यो फिल्म प्रदर्शनमा आउँदैछ ।

यस फिल्मको काम सकिएपछि हिरानी र अमिर बायोपिकको काम सुरु गर्ने योजनामा छन् । अहिले यो फिल्मको स्क्रिप्ट लेखनको काम भइरहेको छ ।

दादासाहेब फाल्केलाई ‘भारतीय सिनेमाको पिता’ उपनामले पनि चिनिन्छ ।