काठमाडौं – चीनका राष्ट्रपति सी जिनपिङ दक्षिणपूर्वी एसिया भ्रमणका क्रममा मलेसिया आइपुगेका छन् । बेइजिङ– वासिङ्टन गम्भीर व्यापार युद्धका बीचमा यो भ्रमणबाट सी चीनको सकारात्मक सन्देश बोकेर हिँडेका छन् । अमेरिकाभन्दा बढी भरपर्दो व्यापारिक साझेदार चीन हो भन्ने व्यक्तिगत सन्देश दिन चहान्छन् राष्ट्रपति सी ।

सी भियतनाम भ्रमण सकेर मङ्गलबार साँझ मलेसियाका राजधानी क्वालालम्पुर आइपुगेका थिए । सन् २०१३ पछिको उनको पहिलो मलेसिया भ्रमण हो । उनी भियतनामबाट उनी त्यहाँ पुगेका थिए । जहाँ उनले हनोईमा कृत्रिम बुद्धिमत्ता (एआई) देखि रेल विकाससम्मका सबै विषयमा दर्जनौं व्यापार सहयोग सम्झौतामा हस्ताक्षर गरेका थिए ।

मलेसियाको आधिकारिक समाचार एजेन्सी बर्नामाका अनुसार भेटघाटको क्रममा सीले भने, ‘उच्चस्तरीय रणनीतिक सहयोगलाई गहिरो बनाउनु चीन र मलेसिया दुवैको साझा हितको लागि राम्रो छ, र यो क्षेत्र साथै विश्वमा शान्ति, स्थिरता र समृद्धिको लागि पनि राम्रो छ ।’

अमेरिकाले विश्वभरका देशहरूमा ठूलो मात्रामा भन्सार शुल्क लगाएपछि १० सदस्यीय दक्षिणपूर्वी एसियाली राष्ट्रहरूको संघ (आसियान) ब्लकका धेरै देशहरू असन्तुष्ट छन् । यही मेसोमा सी तीन देशको भ्रमणमा निस्किएका हुन् । अमेरिकी राष्ट्रपति डोनाल्ड ट्रम्पको कठोर प्रशासनभन्दा बेइजिङ दक्षिणपूर्वी एसियाको राम्रो मित्र हो भन्ने उनको सन्देश रहेको छ ।

‘यो एकदमै महत्वपूर्ण भ्रमण हो । यसमा धेरै कुराहरू सिक्न सक्नुहुन्छ ।’ अमेरिकाका लागि पूर्व मलेसियाली राजदूत तथा कानुनी मामिला मन्त्री मोहम्मद नजरी अब्दुल अजिजले भने, ‘चीनले हामीलाई अमेरिकाभन्दा बढी भरपर्दाे व्यापारिक साझेदार भएको बताउँदै आएको छ । हामीलाई उनीहरूसँग व्यवहार गर्न कहिल्यै समस्या भएन ।’

‘प्रधानमन्त्री अनवरको नेतृत्वमा, मलेसिया चीनसँगै धेरै नजिक हुँदै गइरहेको छ । यो राम्रो कुरा हो’, उनले थपे, ‘लामो समयदेखि रहिआएको वाशिङटनको प्रभाव कम हुनेछ ।’

चीनसँग व्यापारिक सम्बन्ध र कूटनीतिक सम्बन्ध बलियो हुँदै गइरहेको पूर्वराजदूत अजिजले बताए । उनले दुवै देशलाई फाइदा भइरहेको उल्लेख गरे । पूर्व राजदूत अजिजले भने, ‘हामी चीनमा धेरै केन्द्रित छौं । त्यो हाम्रो मानसिकता हो ।’

– अलजजिरा