काठमाडौं– चालु आर्थिक वर्षको ९ महिना अर्थात् चैत महिनासम्म नेपालमा ५७ अर्ब बढीको विदेशी लगानी प्रतिबद्धता आएको छ । उद्योग विभागले प्रकाशन गरेको तथ्याङ्कअनुसार चालु आर्थिक वर्षको चैत महिनासम्म नेपालमा ५७ अर्ब ९७ करोड ५४ लाख ७३ हजार चार सय रुपैयाँ बराबरको विदेशी लगानी प्रतिबद्धता आएको हो ।

विभागका अनुसार समीक्षा अवधिमा २ अर्ब ८९ करोड ७९ लाख ९७ हजार रुपैयाँको विदेशी लगानी प्रतिबद्धता अटोमेटिक रुटबाट आएको हो भने बाँकी लगानी प्रतिबद्धता म्यानुअल रुटबाट आएको हो । समीक्षा अवधिमा विभिन्न ३२ वटा कम्पनीको १ अर्ब ९४ करोड ५० लाख ४१ हजार रुपैयाँ बराबरको शेयर खरिद तथा प्रविधि हस्तान्तरण गर्ने स्वीकृति विदेशी लगानीकर्ताले लिएका छन् ।

समीक्षा अवधिमा ४७६ वटा विभिन्न उद्योगमा विदेशी लगानीको प्रतिबद्धता आएकोमा त्यसमध्ये ४६८ वटा साना, ८ वटा मझौला र ४ वटा ठूला उद्योग रहेका छन् । त्यसमा पनि समीक्षा अवधिमा आएको विदेशी लगानीकर्ता प्रतिबद्धताअनुसार उनीहरूको सबैभन्दा ठूलो  आकर्षण नेपालको सूचना प्रविधि पर्यटन क्षेत्रमा देखिएको छ ।

समीक्षा अवधिमा आएको विदेशी लगानी प्रतिबद्धता मध्ये १८९ वटा अर्थात् ३९ प्रतिशत पर्यटन क्षेत्रमा र १८५ अर्थात् ३९ प्रतिशत सूचना प्रविधि क्षेत्रका उद्योगमा आएको छ । त्यस्तै सेवा क्षेत्रमा ६३ वटा अर्थात् १३ प्रतिशत विदेशी लगानीको प्रतिबद्धता आएको छ भने र बाँकी अन्य उत्पादन, उर्जा र कृषि क्षेत्रमा आएको विभागको तथ्याङ्कले देखाएको छ ।

त्यस्तै, समीक्षा अवधिमा नेपालको विभिन्न उद्योगमा लगानी गरेका विदेशी लगानीकर्ताले १ अर्ब ४७ करोड २० लाख २२ हजार ९८९ नेपाली रुपैयाँ, ९३ लाख २४ हजार ७३० अमेरिकी डलर, ३८ करोड ३५ लाख ५४ हजार ५१७ रुपैयाँ भारतीय र ६१ हजार ४३१ युरो रोयल्टी बापत लगेका छन् । उक्त अवधिमा विदेशी लगानीकर्ताले डेढ अर्ब बढी रकम सेवा खर्च बापत पनि लगेको विभागको तथ्याङ्कले देखाएको छ ।