काठमाडौं- काठमाडौं स्कुल अफ ल (केएसएल) का संस्थापक एवम् पूर्वमहान्यायाधिवक्ता युवराज संग्रौलामाथि लागेको विद्यार्थीलाई दुर्व्यवहारसम्बन्धी आरोपबारे छानबिन हुने भएको छ ।

केएसएलमा अध्ययनरत विधार्थीले आफूमाथि दुर्व्यवहार गरिएको र यौनिक तथा लैंगिक अल्पसंख्यक व्यक्तिहरूप्रति कलेज अनुदार रहेको आरोप लगाएपछि भएको विवादबारे छानबिन गर्न समिति बनाइएको हो ।

गत २४ फागुनमा केएसएलकी एक विद्यार्थीले आफूलाई तीन महिनाअघि कलेजमा यौन दुर्व्यवहार गरिएको भन्दै उजुरी दिएकी थिइन् ।

सामाजिक सञ्जाल इन्स्टाग्राममा ती विद्यार्थीले पूर्वमहान्यायाधिवक्ता समेत रहेका संग्रौलाले कलेजमा छात्राहरूसँग यौनजन्य टिप्पणी र महिलाको शरीरबारे अपमानजनक शब्द प्रयोग गर्ने गरेको आरोप लगाएकी थिइन् ।

उक्त आरोपबारे छानबिनका लागि पूर्वन्यायाधीश श्रीकृष्ण भट्टराईको संयोजकत्वमा वरिष्ठ पत्रकार तीर्थ कोइराला र अधिवक्ता सीमा धामी रहेको तीन सदस्यीय जाँचबुझ समिति बनाइएको हो ।

एकजना विद्यार्थीले सङ्ग्रौलालगायत केही शिक्षकमाथि पढाउने क्रममा कक्षामा यौन दुर्व्यवहार गरेको आरोप लगाउँदै इन्स्ट्राग्राममा लेखेपछि विवाद सुरू भएको थियो ।