काठमाडौं- राष्ट्रिय जनमोर्चा पार्टीका अध्यक्ष चित्रबहादुर केसीले अमेरिका अवैध रुपमा बसेका नेपालीलाई पनि भारतीयलाई जस्तै हातखुट्टा बाँधेर फर्काइदिन सक्ने बताएका छन् ।

अवैध रुपमा बसेका नेपालीहरू अब धमाधम फर्किने क्रम सुरु हुनसक्ने बताउँदै उनले आइतबार बसेको प्रतिनिधिसभा बैठकको आकस्मिक समयमा सरकारको गम्भीर ध्यानाकर्षण गराएका हुन् ।

केसीले त्यहाँ रहेका नेपालीलाई अमेरिकाले नेल, हतकडी र जन्जिर लगाएर डिर्पोट गर्न लागेको बताउँदै यसबारे सरकारको बेलैमा ध्यान दिन जरुरी रहेको बताए ।

‘नेपालका कयौँ नागरिक गैरकानुनी रुपमा अमेरिकामा छन् । नेपालीलाई पनि भारतीयलाई जसरी अमेरिकाले नेल, हतकडी र जन्जिर लगाएर अमानवीय कार्य नहोस् भनेर अहिलेदेखि नै सचेत हुनुपर्ने आवश्यकता छ ’, उनले भने, ‘यदि यसमा ध्यान नदिए विश्व समुदायमा नेपालको प्रतिष्ठामा आँच पुग्नसक्छ । यदि अमेरिकामा गैरकानुनी रुपमा नेपाली लुकेका भए फिर्ताका लागि आवश्यक व्यवस्था मिलाउन सरकारको ध्यानाकर्षण गराउँछु ।’