काठमाडौंं – अवैध रुपमा खानी दोहन गरेको आरोपमा अफ्रिकी मुलुक प्रजातान्त्रिक गणतन्त्र कंगोमा तीन जना चिनियाँ नागरिकलाई ७ वर्षको जेल सजाय सुनाइएको छ । कंगोको अदालतले उनीहरुलाई ६ लाख अमेरिकी डलर जरिवाना समेत तिर्न आदेश दिएको छ ।

उनीहरुलाई गत जनवरी ४ मा १० वटा सुनको बार र ४ लाख अमेरिकी डलरसहित पक्राउ गरिएको थियो । उनीहरुलाई ठगी, सम्पत्ति शुद्धीकरण र लुटपाटको अभियोगमा पनि दोषी ठहर गरिएको छ ।

हाल उनीहरुलाई प्रजातान्त्रिक गणतन्त्र कंगोको पूर्वी शहर बुकाभुमा राखिएको समाचार संस्था एपीले जनाएको छ । औपचारिक अनुमतिबिना प्रजातान्त्रिक गणतन्त्र कंगोमा खानी दोहन गरेको आरोपमा विदेशी नागरिकलाई दोषी ठहर गरिएको यो पहिलो घटना हो ।

पूर्वी कंगोमा धेरैवटा चिनियाँ कम्पनीहरु सुन तथा अन्य महत्वपूर्ण खनिज पदार्थको उत्खननमा सक्रिय छन् । चिनियाँ अभियुक्तका कानुन व्यवसायीले भने अदालतको आदेशविरुद्ध पुनरावेदन गर्ने बताएका छन् ।