काठमाडौं- पाकिस्तानका ८० प्रतिशत जनसङ्ख्या शुद्ध पिउने पानीको पहुँचबाट टाढा रहेको पाइएको छ । एशियाली विकास बैंक एडीबीले सार्वजनिक गरेको तथ्यांकमा ८० प्रतिशत पाकिस्तानीको पहुँचमा शुद्ध पिउने पानी नरहेको उल्लेख छ ।

बैंकको जलविकास आउटलुक प्रतिवेदनमा पाकिस्तानमा जलअसुरक्षा बढिरहेको उल्लेख छ । यसका लागि तत्काल सुधार र लगानी आवश्यक रहेको जनाइएको छ ।

पाकिस्तानमा जलसुरक्षाका लागि आगामी दशकमा ३५ देखि ४२ अर्ब अमेरिकी डलर आवश्यक छ । जल प्रशासन, आपूर्ति, पूर्वाधार र संरचनागत क्षमता विकासका लागि उक्त लगानी आवश्यक रहेको बैंकको प्रतिवेदनलाई उल्लेख गर्दै पाकिस्तानबाट प्रकाशित हुने द नेशन अखबारले जनाएको छ ।

तीव्र जनसङ्ख्या वृद्धिका कारण प्रतिव्यक्ति पानीको उपलब्धता ह्वात्तै घटेको प्रतिवेदनले जनाएको छ । हाल पाकिस्तानमा प्रतिव्यक्ति पानीको उपलब्धता २ हजार ४ सय घनमिटरमा सीमित भएको छ ।

बैंकका अनुसार सन् १९७२ मा पाकिस्तानमा पानीको उपलब्धता प्रतिव्यक्ति ३ हजार ५ सय घनमिटर रहेको थियो । सन् २०३० सम्म यो १ हजार १ सय घनमिटरमा सीमित हुने बैंकको प्रक्षेपण छ ।