काठमाडौं- पाकिस्तानमा पछिल्लो तीन महिनामा भएको हिंसामा परी ९ सय जनाभन्दा धेरैको ज्यान गएको छ । पछिल्लो समय पाकिस्तानमा लडाकु समूहबाट हुने हिंसा बढिरहेको पाइएको छ ।

लडाकु समूहको हिंसाका विरुद्धमा सेनाले पनि प्रतिआतंकवाद कारवाहीलाई निरन्तरता दिइरहेको छ । यस्तो अवस्थामा हिंसाका कारण ज्यान गुमाउनेको सङ्ख्या पनि बढिरहेको छ । सेन्टर फर रिसर्च एण्ड सेक्युरिटी स्टडिजका अनुसार सन् २०२५ पछिल्ला केही दशकयताकै सबैभन्दा हिंसात्मक वर्ष बन्न पुगेको छ ।

सेन्टरलाई उद्धृत गर्दै खामा प्रेसले जनाए अनुसार पछिल्लो तीन महिनामा पाकिस्तानमा भएका हिंसाका क्रममा ९ सय १ जनाको ज्यान गएको छ । यसमा सुरक्षाकर्मी, सर्वसाधारण, लडाकुहरु पनि समावेश छन् । त्यसैगरी, सोही अवधिमा अरु ५ सय ९९ जना घाइते भएका छन् ।

यस अवधिमा पाकिस्तानमा विभिन्न ३ सय २९ वटा हिंसात्मक घटना भएका छन् । अघिल्लो वर्षको सोही अवधिको तुलनामा यो ४६ प्रतिशतले धेरै हो ।

सेन्टरका अनुसार सन् २०२५ को जनवरीदेखि सेप्टेम्बर महिनासम्म मुलुकमा भएका हिंसामा परी २ हजार ४ सय १४ जनाले ज्यान गुमाएका छन् । गत वर्ष सन् २०२४ भरीमा पाकिस्तानमा यस्ता घटनामा परी २ हजार ५ सय ४६ जनाले ज्यान गुमाएका थिए ।