काठमाडौँ- नेकपा (एमाले) का अध्यक्ष केपी शर्मा ओलीले सामाजिक सञ्जालमा आलोचना भए पनि आफू पार्टी नेतृत्वबाट हट्न नहुने स्पष्ट पारेका छन् ।

बुधबारदेखि ललितपुरमा सुरू भएको एमालेको दशौँ केन्द्रीय समिति बैठकलाई सम्बोधन गर्दै उनले तत्कालै पद छोड्ने कुनै योजना नरहेको र निर्णय गर्ने स्थान केन्द्रीय समिति एवम् महाधिवेशन नै भएको बताए ।

ओलीले भने ‘मैले हट्नुपर्छ भनेर फेसबुकले निर्णय सुनाउने होइन’, उनले थपे, ‘यो कमिटीले भन्छ भने म छोड्छु। यो आदेश दिने ठाउँ हो, म जुनसुकै आदेश मान्छु।’

उनले केही सदस्यहरुले बैठकबाहिर निस्केर सामाजिक सञ्जालमा लोकप्रियतावादी लेख्ने अभ्यासप्रति तिव्र असन्तोष व्यक्त गरे । उनले नेताहरूलाई सर्वसाधारणमा भ्रम फैलाउने व्यवहार रोक्न पनि चेतावनी दिए। ‘यो कमिटीमा बसेर यो कमिटीको कोही सदस्यले बाहिर गएर फेसबुकमा लेखेर लोकप्रियतावादको पछि कुदेर लेखिरहेका छन्,’ उनले भने, ‘मैले एमाले अध्यक्षबाट हट्नुपरे यो कमिटीले निर्णय गरोस् । म यहाँबाट निर्णय भए सहज रुपमा स्वीकार्छु, कालो मुख लगाएर जान्न ।’

अध्यक्ष ओलीले विरोधीहरूको आलोचना र आक्रोशलाई राजनीतिक उद्देश्यले व्यवस्थापन गरिनु नहुने तर्क गरे । पार्टी कार्यालय र घरमा आगो लगाउन मन लागेकाले जलाएका छन्’, उनले भने, ‘विरोधीहरूले मन नपराएरै आगो लगाएका हुन् ।’

आफ्नो आलोचना सन्दर्भमा ओलीले सक्दो बचाउ गरे । ‘मैले भ्रष्टाचार गरेको, आचरण खराब गरेको, देश विकासको काम नगरेको होइन। काम गर्ने जाँगर छैन भन्ने पनि होइन’, उनले भने, ‘पार्टीको निर्णायक निकायले नै भविष्यमा के गर्छ त्यहीअनुसार अघि बढ्ने हो । मलाई केन्द्रीय कमिटीले र महाधिवेशनले हटाउने हो, सामाजिक सञ्जालले होइन ।’