काठमाडौं– मौद्रिक नीति आएको दोस्रो दिन घटेको बजारमा मंगलबार फेरी रौनक फर्किएको छ । असार मसान्त भएकाले ब्रोकर देखि लगानीकर्ताले समेत सेटलमेन्ट गर्नुपर्ने दबाबका बीचमा पनि शेयर बजारमा वृद्धि देखिएको छ। 

सामान्यतया असार मसान्तको अन्तिम दिनहरूमा ब्रोकरले लगानीकर्तालाई लिमिट दिने गरेका हुँदैनन् । यो समयमा लगानीकर्ताले क्यासमा कारोबार गर्नुपर्ने हुन्छ । लगानीकर्ताले यो समयमा प्राय शेयर बेच्ने भएकाले सेलिङ पेसर आउने भएकाले बजार घट्ने गर्छ । 

तर, मौद्रिक नीतिमा शेयर बजारका लागि लचिलो व्यवस्था आएकाले गर्दा मंगलबार बजारमा रौनक फर्किएको हो। मंगलबार नेपाल स्टक एक्सचेञ्ज (नेप्से) ३४.४६ अंकले बढेको छ । असार मसान्त सकिन्न दुई दिन अगाडि अर्थात असार ३१ गते नेप्से १.२६ प्रतिशतले बढेर २७६०.१७ विन्दुमा पुगेको छ। 

नेप्से बढ्दा ९ अर्ब ४१ करोड ९१ लाख ६५ हजार रुपैयाँ बराबरको २ करोड ५६ लाख १७ हजार २०९ कित्ता शेयर कारोबार भएको छ । बजार बन्द हुँदा २०९ वटा कम्पनीको शेयर मूल्य बढेको छ भने ३९ वटा कम्पनीको शेयर मूल्य घटेको छ । कुनैपनि कम्पनीको शेयर मूल्य भने स्थिर छैन । 

यस्तै ३१७ वटा कम्पनी कारोबारमा आउँदा ७४ हजार ५७ पटक शेयर किनबेच भएको छ । १३ समूहमध्ये सबै समूह बढेको छ । मंगलबार सबैभन्दा बढी वाणिज्य बैंक समूह बढेको छ भने सबैभन्दा कम म्युचुअल फन्ड भएको छ ।