काठमाडौं– मलेशियाका सुरक्षा निकायले बंगलादेशी आप्रवासीलाई लक्षित गरी आतंककारी संगठन इस्लामिक स्टेटको प्रचार गर्ने सञ्जाल ध्वस्त पारेको छ । इस्लामिक स्टेटको प्रचार गर्ने र उक्त संगठनका लागि पैसा उठाउने गिरोहलाई ध्वस्त पारेको मलेशिया प्रहरीले जनाएको छ ।

समाचार संस्था रोयटर्सका अनुसार पक्राउ पर्नेमा ३६ जना बंगलादेशी नागरिक छन् । उनीहरु गत अप्रिल महिनादेखि यस कार्यमा संलग्न रहेको जनाइएको छ ।

उक्त गिरोहले विद्युतीय भुक्तानीका माध्यमको प्रयोग गरी सिरिया र बंगलादेशमा पैसा समेत पठाउँदै आएको थियो । यद्यपि कति रकम पठाइएको हो भन्नेबारे अधिकारीले कुनै जानकारी दिएका छैनन् ।

यस गिरोहमा १ सय देखि १ सय ५० जना संलग्न रहेको हुनसक्ने आशंका गरिएको छ । राजधानी कुआलालम्पुरमा सन् २०१६ मा आक्रमण भएपछि मलेशियाले इस्लामिक स्टेटविरुद्ध कारवाही सञ्चालन गरेको थियो ।