काठमाडौं – ‘पूर्णबहादुरको सारङ्गी’पछि नायक विजय बराल लिड भूमिकामा रहेको पहिलो फिल्म ‘जनै हराएको मान्छे’को टिजर सार्वजनिक भएको छ । भदौ ६ बाट प्रदर्शनमा आउन लागेको यस फिल्मको टिजर मंगलबार सार्वजनिक भएको हो ।

टिजरले एक ग्रामिण गरिब परिवारको बुवा-छोराको भवनात्मक कथामा फिल्म बनेको संकेत गर्छ ।

धन कमाउन कोरिया जाने सपना बोकी विजयले गाउँ छाडेको विषयमा टिजर केन्द्रित छ । गाउँ छाड्ने बेला एक व्यक्तिलाई विजयले कारुणिक आवाजमा भन्छन्, ‘मेरो सपना पूरा नहुने बेलासम्म मेरो बालाई बूढो नहुनु भन्दे है ।’

कोरिया जान काठमाडौं छिरेका विजय काठमाडौंमा संघर्षमै रुमलिएको देखाइएको छ । काठमाडौं टिक्नका लागि उनले रिक्सा चलाउने र जादु देखाउनेलगायतका कामहरु गर्छन् ।

काठमाडौंमा संघर्षमै हराएका विजयले विदेश यात्रा गर्छन् कि गर्दैनन् ? यसको जवाफ टिजरमा छैन ।

काठमडौंमा उनको नायिका मिरुना मगरसँग भेट भएको देखिन्छ । उनीहरुबीच प्रेम अंकुराएको टिजरले प्रष्ट पारेको छ । मिरुनाले विजयलाई भन्छिन्, ‘मलाई तिमी कस्तो आफ्नै मान्छे जस्तो लाग्छ ।’

टिजरमा नायक विजय हाबी छ । मिरुनाको एक मात्रै संवाद छ । टिजरमा नायिका केकी अधिकारीलाई थोरै स्थान दिइएको छ । उनको कुनै पनि संवाद छैन । केकी र विजयको भेट हुन्छ तर उनीहरुको सम्बन्ध टिजरले खुलाएको छैन ।

टिजरमा विजय, केकी, मिरुनासहित भोलाराज सापकोटा, सुशांक मैनाली, विशाल पहारी र रेयर राई लगायतलाई स्थान दिइएको छ ।

टिजरले फिल्म सामाजिक कथामा बनेको प्रष्ट पारेको छ। यसको लेखक भानुभक्त ढकाल हुन् । निर्देशक हिमाल न्यौपाने हुन् । पेपरक्लिप ब्यानरमा बनेको यस फिल्मको निर्माताहरु कमल न्यौपाने र विमद न्यौपाने हुन् ।

टिजर :