काठमाडौं– आगामी पाँच वर्षमा द्विपक्षीय व्यापार २० अर्ब डलर पुर्‍याउन ब्राजिल र भारत सहमत भएका छन् । भारतीय प्रधानमन्त्री नरेन्द्र मोदीको ब्राजिल भ्रमणका क्रममा यस्तो सहमति भएको हो ।

भारतीय विदेश मन्त्रालयले आगामी ५ वर्षमा द्विपक्षीय व्यापारलाई २० अर्ब डलर पुर्‍याउन प्रधानमन्त्री मोदी र ब्राजिलका राष्ट्रपति लुला डा सिल्भा सहमत भएको जनाएको छ । यस्तै दुई मुलुकबीच व्यापार, लगानी, वाणिज्यजस्ता विषयको निगरानी गर्नका लागि मन्त्रीस्तरीय संयन्त्र निर्माण गर्ने विषयमा पनि सहमती भएको छ ।

भारतीय समाचार संस्था एएनआईका अनुसार भेटवार्ताका क्रममा दुई नेताबीच सुरक्षा, कृषि, खाद्य, ऊर्जा, जलवायु परिवर्तन, आर्टिफिसियल इन्टिलिजेन्सजस्ता विषयमा छलफल भएको छ । ब्रिक्स सम्मेलनमा सहभागी हुन प्रधानमन्त्री मोदी ब्राजिल पुगेका हुन् ।