काठमाडौं– काठमाडौंको बबरमहलस्थित होप फर्टिलिटी एण्ड डाइग्नोस्टिक प्राइभेट लिमिटेडले १८ वर्षमुनिका दुई किशोरीको डिम्ब बिक्री गरेको आरोपमा नेपाल प्रहरीको केन्द्रीय अनुसन्धान ब्युरो (सीआईबी)ले अनुसन्धान सुरू गरेको छ । 

ती किशोरीका अभिभावकले दिएको जाहेरीका आधारमा प्रालिका ५ जनालाई आइतबार र सोमबार नियन्त्रणमा लिएर सोधपुछपछि छोडेको छ । उनीहरूलाई हाजिरी जमानीमा राखेर अनुसन्धान अघि बढाइएको सीआईबीका प्रवक्ता एसपी युवराज खड्काले बताएका छन् ।

होप फर्टिलिटीमा १८ वर्षमुनिका किशोरीहरूलाई बोलाएर इन्जेक्सनमार्फत् डिम्ब निकाल्ने गरेको उजुरी सीआईबीमा परेको थियो । त्यहाँ किशोरीहरूलाई १० हजारदेखि १५ हजार रुपैयाँसम्म दिएर डिम्ब निकाल्ने गरेको पाइएको ब्युरोले जनाएको छ । 

पीडित किशोरीहरूले सीआईबीलाई दिएको जानकारी अनुसार होपमा उनीहरूलाई १० दिनसम्म इन्जेक्सन लगाएर राखिएको थियो । 

यसरी सुई लगाएर विकास भइसकेपछि उनीहरूको शरीरबाट डिम्ब निकालेर सुरक्षित गरेर राख्ने गरेको पाइएको सीआईबीको अनुसन्धानबाट खुलेको छ ।