पोखरा– गण्डकी प्रदेशका आर्थिक मामिला मन्त्री डा टकराज गुरुङले प्रदेश सभाको बैठकमा आगामी आर्थिक वर्षका लागि बजेट प्रस्तुत गर्न थालेका छन् । 

४ बजे बैठक सुरु हुने कार्यसूची रहे पनि एक घन्टा ढिला गरी सुरु भएको छ । 

अर्थमन्त्री गुरुङले अघिल्ला वर्ष ब्रिफकेसमा बजेट ल्याए पनि यसपालि कपडाको झोलामा बजेट लिएर आए । छालाको फिता भएको झोलालाई बाहिरबाट रंगीन कागजले मोडिएको थियो ।  

मन्त्री गुरुङले सार्वजनिक निजी साझेदारीमा प्रदेशको विकासका खाका कोरिएको बताए । उनले संघीयताका लाभ समन्यायिक तरिकाबाट अनुभूति गराउने गरी प्रदेशले काम गरिरहेको बताए । 

उनले चालु आर्थिक वर्ष २०८१/८२ मा गण्डकी प्रदेशको आर्थिक वृद्धिदरले राष्ट्रिय औसतलाई उछिनेर तीव्र गतिमा विस्तार हुने बताए । राष्ट्रिय अर्थतन्त्र ३.९९ प्रतिशतले विस्तार हुने अनुमान हुँदा गण्डकी प्रदेशको अर्थतन्त्र भने आधारभूत मूल्यमा ४.८८ प्रतिशतले बढ्ने आधार उनले प्रस्तुत गरेको हो । 

प्रदेशको कुल गार्हस्थ्य उत्पादन (उपभोक्ता मूल्यमा) चालु आर्थिक वर्षमा करिब ५ खर्ब ४८ अर्ब रुपैयाँ पुग्ने प्रारम्भिक अनुमान गरिएको छ, जुन गत आर्थिक वर्षको संशोधित अनुमान रु. ५ खर्ब १८ अर्बभन्दा उल्लेख्य रूपमा बढी रहेको उनले बताए ।