काठमाडौं– सत्ता साझेदार दल नेपाली कांग्रेसका सांसद राजेन्द्र बजगाईँले नेपालको एकीकरण गर्ने गोरखामा बजेट कटौती भएको आरोप लगाएका छन् । सांसद बजगाईँले प्रधानमन्त्री केपी शर्मा ओलीलाई गोरखा जिल्ला लुकेको कर्णाली हो भन्ने थाहा हुँदा हुँदै पनि बजेट कटौती गरेको आरोप लगाए ।

‘बुढीगण्डकी परियोजना निर्माण गर्ने अठोट पनि छ । नेपालको अर्थतन्त्र चलायमान गर्न कहाँकहाँ अवरोध छन् त्यो पनि थाहै छ !’ उनले भने ।

यसैको विरोधस्वरुप सांसद बजगाईँ आज संसदको बैठकमा दर्शकदीर्घामा बसेका थिए ।

सांसद बजगाईँले नेपालको भूगोल र प्रजातन्त्रको आधारभूत तत्व भनेको नागरिकका मौलिक अधिकारहरू र स्रोत साधनको समान वितरण हो भन्ने कुरा भौतिक पूर्वाधार तथा यातायातमन्त्री देवेन्द्र दाहालले नबुझेको पनि टिप्पणी गरे । ‘सायद तपाईँले गोरखामा बिना सडकको पुल निर्माण गर्ने तत्कालिन पूर्वाधारमन्त्रीको पक्षपोषण गर्नुभयो !’ उनले भने ।

प्रजातान्त्रिक मूल्यको मर्म नबुझेका र देशको भूगोलप्रति आवश्यक समझदारी नराख्ने भौतिक पूर्वाधार तथा यातायातमन्त्री दाहाल गोरखा मात्र नभइ देशभरिका लागि बजेटको न्यायसङ्गत वितरण गर्न अयोग्य रहेको उनको भनाइ छ ।

‘गोरखाली जनताको तर्फबाट म उहाँको निर्णयको घोर भर्त्सना गर्दछु । पछिल्ला दुई आर्थिक वर्षमा हामीले गोरखाका लागि सुनिश्चित गरेको करिब चार दर्जन बजेट शीर्षकहरू उहाँले काटिदिनु भएको छ— जुन सरासर अन्यायपूर्ण र दुर्भाग्यपूर्ण छ ।’ उनले भने ।