काठमाडौं– नेपाली कांग्रेसका प्रवक्ता डा. प्रकाशशरण महतले १५ औँ महाधिवेशन ०८२ सालमा सम्भव नरहेको बताएका छन् । 

नेपाल प्रेस युनियन चितवनले शनिबार आयोजना गरेको पत्रकार सम्मेलनमा उनले तयारी नपुगेका कारण कांग्रेसको आगामी महाधिवेशन ०८२ सालमा सम्भव नरहेको बताएका हुन् ।

‘पार्टीको १५औँ महाधिवेशन केही समय पछि सर्न सक्छ । तयारी केही पुगेको छैन,’ प्रवक्ता महतले भने, ‘तयारीका लागि केही समय थप गर्न सकिन्छ ।’ 

विधानतः एक वर्ष छ महिना थप्न सकिने भए पनि कति समय थप गर्ने भन्ने बारे  केन्द्रीय कार्यसमितिको बैठकले निर्णय गर्ने उनको भनाइ छ ।प्रवक्ता महतले सरकारले ल्याएका अध्यादेशहरू पास गर्ने विषयमा विपक्षी दलहरूसँग छलफल भइरहेको पनि बताए ।

‘पाँच वटा अध्यादेशमा केही समस्या छैन, भूमिसम्बन्धी अध्यादेशमा देखिएको समस्या प्रतिस्थापन विधेयकबाट पास हुन्छ,’ उनले भने ।