काठमाडौं– गायक ज्ञानेश कुमार कर्णकाे स्वरमा ‘बितेका कुरा’ बोलको गीत सार्वजनिक भएको छ ।

भ्यालेन्टाइन डेको अवसरमा शुक्रबार साँझ उनकै युट्युब च्यानलमार्फत् उक्त गीत सार्वजनिक गरिएको हो ।

गीतमा पत्रकार शिल्पा कर्ण (वैदेही) का शब्द रहेका छन् भने आवाज, सङ्गीत रचना र लय ज्ञानेशको रहेको छ । सङ्गीत व्यवस्थापन भने राजु शाहले गरेका छन् । भिडियो छायाङ्कन, निर्देशन र सम्पादन रणधीर श्रेष्ठले गरेका हुन् ।

यस म्युजिक भिडियोको मुख्य भूमिकामा अशोक आर्यन यादव र शुभेच्छा पौडेल छन् । लामो समयपछि अचानक भेटिएका पूर्वप्रेमीको कथा भिडियोमा देखाइएको छ । कथा तथा स्क्रिप्ट वैदेहीले तयार गरेकी हुन् ।

यसअघि ज्ञानेशकै आवाजमा हामी नेपाली, म अनि तिमीजस्ता गीत उनकै युट्युब च्यानलमा सार्वजनिक भइसकेका छन् । मुख्य रुपमा सूचना प्रविधि क्षेत्रमा कार्यरत ज्ञानेश, सङ्गीत रुचिको विषय भएको बताउँछन् ।