काठमाडौं – डेब्यू निर्देशक जुनिम गहतराजको फिल्म ‘ताण्डवम्’को पोस्टर सार्वजनिक गरी प्रदर्शन मिति घोषणा गरिएको छ ।

निर्माण पक्षले मंगलबार एक पोस्टर सार्वजनिक गरी प्रदर्शन मिति फागुन ९ गतेलाई तय गरिएको जानकारी दिएको हो ।

सार्वजनिक पोस्टरमा कलाकार पुष्कर गुरुङ, प्रेम सुब्बा, सरिना मगर, अंकित खड्का, अनोज पाण्डे, र जुनिम गहतराज फिचर्ड छन् । यी सबै फिल्मका मुख्य कालकार रहेको निर्माण पक्षले जनाएको छ ।

पोस्टरमा फुटेको काँचको आकारमा कलाकारको तस्बिर राखिएको छ । पोस्टरमा केही कलाकार क्रोधित, केही रक्ताम्य र एक जोडी रोमान्टिक भावमा प्रस्तुत छन् ।

निर्माण पक्षका अनुसार यो फिल्मको कथा पहिलो सन्तानको स्वागतको तयारी गरिरहँदा एक नवदम्पतीको जीवनमा घट्ने अकल्पनीय घटनामा आधारित छ । एक्सन थ्रिलर जनरामा फिल्म निर्माण भएको निर्माण पक्षको दाबी छ ।

सिंहदेवी प्रोडक्सनको ब्यानरमा निर्माण भएको यो फिल्म अनिरुद्ध आत्रेय र हुसेनले लेखेका हुन् । निर्माता भने धनकुमारी गहतराज, सविना मगर र मनिष गौतम हुन् ।