काठमाडौं- पाकिस्तानमा पोलियो रोगका बिरामीको सङ्ख्या बढ्दै गएको छ । खासगरी सिन्ध प्रान्तमा पोलियो रोग विस्तार तीव्र गतिमा भइरहेको पाकिस्तानबाट प्रकाशित हुने डन अखबारले जनाएको छ ।

हालसम्म सिन्धका २१ युनियन परिषदमा पोलियो रोगका बिरामी देखा परेका छन् । पोलियोको विस्तार तीव्र भएसँगै त्यहाँको सरकारले आवश्यक सावधानी र नियन्त्रणका उपाय अपनाउन अधिकारीलाई निर्देशन दिएका छन् ।

यस वर्षको मध्यदेखि हालसम्म वातावरणीय नमूनाको परीक्षण गर्दा ७५ प्रतिशतमा पोलियो पोजेटिभ देखिएको डनले उल्लेख गरेको छ । यो दशक यताकै उच्च हो ।

सिन्ध प्रान्तमा डिसेम्बर १५ देखि २१ सम्म राष्ट्रिय रोग प्रतिरोधात्मक दिवस मनाइँदैछ । यस क्रममा १ करोड ६ लाख बालबालिकालाई पोलियोविरुद्धकोे खोप लगाइने तयारी भइरहेको छ ।

यस क्रममा ८० हजारभन्दा धेरै स्वास्थ्यकर्मी परिचालन गरिने भएको छ । यसको सुरक्षाका लागि ४०० महिला प्रहरीसहित १२ हजारभन्दा धेरै सुरक्षाकर्मी परिचालन हुनेछन् ।