काठमाडौं- भारतको विदेश मन्त्रालयले अरुणाचल प्रदेश आफ्नो मुलुकको अविभाज्य हिस्सा रहेको दोहोर्‍याएको छ । पछिल्लो समय अरुणाचलका विषयमा चर्चा भइरहेका बेला भारतीय विदेश मन्त्रालयले आफ्नो अडान दोहोर्‍याएको हो ।

विदेश मन्त्रालयका प्रवक्ता रणधीर जयसवालले अरुणाचल प्रदेश भारतको हिस्सा रहेको बारम्बार उल्लेख गरिरहेको भन्दै यसबारे कुनै हस्तक्षेप स्वीकार्य नरहेको प्रष्ट्याएका छन् । भारतको प्रशासनमा रहेको अरुणाचल प्रदेशमा चीनले पनि आफ्नो सार्वभौमिकता दाबी गर्दै आएको छ ।

गत महिना चीनको शाङ्घाई विमानस्थलमा अरुणाचल प्रदेशका भारतीय नागरिक पक्राउ परेपछि भारतको यस्तो प्रतिक्रिया आएको हो । प्रवक्ता जयसवालले उक्त घटनाप्रति चिन्ता व्यक्त गरेका छन् ।

भारतले यसबारे चिनियाँ पक्षसँग औपचारिक रुपमा विरोध जनाएको छ । यस घटनासँगै भारतले पनि चीनमा ट्रान्जिट भएर जाने भारतीय नागरिकलाई सतर्कता अपनाउन आह्वान गरेको छ ।