काठमाडौं– अखिल नेपाल फुटबल संघ (एन्फा) ले ‘साफ फुटसल च्याम्पियनसिप २०२६’ का लागि टिम गठन गर्न खेलाडी छनोट प्रक्रिया सुरु गरेको छ । 

आगामी वर्ष थाइल्यान्डमा हुने खेलका लागि राष्ट्रिय पुरुष तथा महिला खेलाडी छनोट प्रक्रिया सुरु गरेको हो । 

राष्ट्रिय टिम प्रशिक्षण र तयारीका लागि सक्षम खेलाडी छनोट गर्न एन्फाले शुक्रबार खुला आवेदन आह्वान गरेको छ । उक्त खेल जनवरी १३ देखि २६ सम्म हुने एन्फाले सार्वजनिक गरेको सूचनामा उल्लेख छ । 

इच्छुक पुरुष र महिला खेलाडीलाई तोकिएको फारम भरी आवश्यक कागजातसहित आवेदन दिन आग्रह गरिएको छ । 

एन्फाको वेबसाइटबाट उपलब्ध फारम भरी पासपोर्ट साइजका २ वटा फोटो राखी इमेलमार्फत वा एन्फा कम्प्लेक्समै उपस्थित भई आवेदन दिन सकिनेछ ।

छनोट कार्यक्रम २०८२ मंसिर ७ देखि १२ गतेसम्म ललितपुरस्थित सातदोबाटो एन्फा कम्प्लेक्समा हुने एन्फाले जनाएको छ ।