काठमाडौं- प्रगतिशील राष्ट्रिय अभियानको केन्द्रीय संयोजन समितिका सदस्य मदन भट्टराईले डा. बाबुराम भट्टराई नेतृत्वको नेसपा नयाँ शक्ति पार्टी जनार्दन शर्मा नेतृत्वमा समाहित हुने कुराको टुंगो लागेको बताएका छन्।

खबरहबसँग कुरा गर्दै भट्टराईले डा भट्टराईको पार्टीसँग एकताको सहमति भएको बताए । उनले अब नयाँ पार्टी बनाएर जाने कुरा लगभग टुंगो भएको उनले बताए ।

भट्टराईले सन्तोष परियार लगायत राष्ट्रिय स्वतन्त्र पार्टीका वाम नेताहरूसँग छलफल जारी रहेकाले उनीहरू पनि अभियानमा जोडेर जाने स्पष्ट पारे।

‘राष्ट्रिय स्वतन्त्र पार्टीका वाम विचारधाराका नेताहरूसँग छलफल भइरहेको छ । सायद सन्तोषजी हामीसँगै जानुहुन्छ होला’, भट्टराईले खबरहबसँग भने, ‘पूर्वप्रधानमन्त्री भट्टराईको नयाँ शक्ति हाम्रो अभियानमा जोडिने अनौपचारिक निर्णय भइसकेको छ।’

भट्टराईले अहिले जनार्दन समूहले पार्टी निर्माण नगर्ने तर विभिन्न विकल्पहरूमा मोर्चा कसेर अगाडि बढ्ने दाबी गरे।

उनले अन्य पार्टीसँग असन्तुष्ट रहेका र वैकल्पिक शक्तिहरू पनि आफ्नो अभियानमा जोडिँदै जाने उल्लेख गरेका छन्।