काठमाडौं – इजरायलमा हमासको आक्रमणपछि अपहरणमा परेका नेपाली विद्यार्थी विपिन जोशीको निधनप्रति प्रतिनिधि सभा सभामुख देवराज घिमिरेले दुःख व्यक्त गरेका छन्।

सभामुख घिमिरेले मंगलबार एक विज्ञप्ति जारी गर्दै जोशीको निधनले केवल उनको परिवारलाई मात्र होइन, सम्पूर्ण नेपाली समाजलाई गहिरो पीडा पुर्याएको बताएका छन्। उनले विपिनको आत्माको चिरशान्तिको कामना गर्दै शोकसन्तप्त परिवारप्रति हार्दिक समवेदना प्रकट गरेका छन्।

विज्ञप्तिमा सभामुख घिमिरेले भनेका छन्, “विपिनको जीवन रक्षाका लागि अरब संसद्का अध्यक्ष मोहम्मद अहमद अल–यमाहीलाई पत्र लेख्दै विशेष पहल गरिदिन अनुरोध गरेको थिएँ। सभामुखको तर्फबाट विभिन्न संसदीय फोरमसँगै कूटनीतिक पहल भए पनि परिणाम दुखद हुन गएको छ।”

उनले इजरायलमा अध्ययनरत जोशी देशका लागि ज्ञान, सीप र अनुभव लिएर फर्कने सपना बोकेका युवा भएको उल्लेख गर्दै उनको असामयिक निधन हृदयविदारक भएको बताएका छन्।

घिमिरेले आगामी दिनमा नेपाली नागरिकको सुरक्षाका लागि नेपाल सरकार, इजरायलस्थित नेपाली दूतावास र सम्बन्धित निकायहरूले अझ प्रभावकारी कदम चाल्ने विश्वास व्यक्त गरेका छन्।