काठमाडौं- नेपाली कांग्रेसका सभापति शेरबहादुर देउवाले तत्काल सभापति पद नछाड्ने घोषणा गरेका छन्।

गत भदौ २३ र २४ गतेको जेन-जी आन्दोलनपछि पहिलोपटक केन्द्रीय कार्यालय सानेपामा सार्वजनिक भएका उनले लिखित सम्बोधन गरे ।

उनले केन्द्रीय कार्यसमिति बैठकमा लिखित मन्तव्य दिँदै मंसिरमा हुने भनिएको १५औँ महाधिवेशनबाट विधिवत रुपमा नेतृत्व नयाँ पुस्तालाई हस्तान्तरण गर्ने बताएका हुन्।

देउवाले सम्बोधनका क्रममा घरमा सधैँ एकजना मात्रै मूली नहुने तर्क गर्दै १५औँ महाधिवेशनबाट अरू नेतालाई सभापति बनाउने बचन दिए ।

‘पार्टीको आन्तरिक जीवन, आगामी १५औँ महाधिवेशन र नेतृत्व हस्तान्तरणका सवाहरू उठेका छन्। म साथीहरूलाई के आग्रह गर्न चाहन्छु भने घरमा सधैँ एकजना मुली रहँदैन’, उनले भने, ‘पार्टीमा पनि हमेसा एउटै सभापति रहिरहँदैन। जहाँसम्म मेरो विषय छ- मैले पहिले नै हाम्रो वैधानिक व्यवस्थाले र मेरो राजनीतिक इच्छाले १५औँ महाधिवेशनबाट नेतृत्व हस्तान्तरण गर्ने भनिसकेको छु। १५औँ महाधिवेशनबाट मबाहेक कुनै साथी सभापति बन्नु हुनेछ। त्यसमा द्विविधा छैन।’