तेहरान- इरानले अमेरिकी राष्ट्रपति डोनाल्ड ट्रम्पले राखेको वार्ता प्रस्तावलाई आलोचना गरेको छ ।

समाचार एजेन्सी रोयटर्सका अनुसार इरानको विदेश मन्त्रालयले मंगलबार अमेरिकी राष्ट्रपति ट्रम्पको संवाद आह्वानको आलोचना गरेको हो।

इरानले वासिङ्टनमाथि वैमनस्यपूर्ण र आपराधिक व्यवहार गरेको आरोप लगाएको छ।

ट्रम्पले इजरायली संसद्मा दिएको सम्बोधनमा तेहरानसँग सम्झौताका लागि तयार रहेको बताएका थिए।

गत जुन महिनामा अमेरिकाले इजरायलसँग मिलेर इरानी आणविक केन्द्रहरूमाथि हमला गरेको थियो।

यसअघि तेहरानसँग भएको पाँच चरणको परोक्ष आणविक वार्ता घरेलु यूरेनियम समृद्धिकरणजस्ता विषयमा विवाद भएपछि रोकिएको थियो।

पश्चिमा देशहरूले इरानमाथि आणविक हतियार बनाउन खोजेको आरोप लगाउँदै आएका छन् ।

तर तेहरानले आफ्नो आणविक कार्यक्रम केवल नागरिक प्रयोजनका लागि भएको दाबी गरेको छ।