काठमाडौं– जेनजी युवा र प्रधानमन्त्री सुशीला कार्की मन्त्री छान्ने आन्तरिक छलफलमा छन् । 

शुक्रबारै प्रधानमन्त्री सुशीला कार्कीले सिंहदरबार आएर पद तथा गोपनीयताको शपथ ग्रहण गर्ने तयारी रहे पनि आन्तरिक समस्याका कारण उनले गर्न नसकेको थिइनन् । उनले आइतबार पदभार ग्रहण गरेकी छन् । 

‘आन्तरिक तयारी नपुगेका कारण हामीले शुक्रबार मन्त्री पठाउन सकेनौ । त्यसपछि हामीले विभिन्न व्यक्तिहरूको अध्ययन र अनुसन्धान गरेर केही लिस्टहरू तयार पारेका छौँ ।’ जेनजी अनिल बानियाले खबरहबलाई भने, ‘सम्भवतः आज बेलुकासम्ममा एक्सपर्ट रहेका तीन चार जना व्यक्तिहरू मन्त्री भएर जानुहुन्छ। जनताले जितेको दिन भएकाले जनताले मन जितेका व्यक्तिहरूलाई नै हामी मन्त्रालयमा पठाउनेछौँ।’ 

बानियाका अनुसार अहिले प्रधानमन्त्री कार्की र जेनजी युवाहरूको मन्त्री पठाउने भन्ने विषयमा छलफलमा छन् । 

बानिया हामी नेपाल अभियानका अभियन्ता समेत हुन् । हामी नेपाली अभियानका संयोजक सुदन गुरुङका विश्वासीलाई पात्र रहेका बानिया सुशीला कार्कीलाई राष्ट्रपतिले प्रधानमन्त्रीको शपथ खुवाएको दिन उनीसँगै देखिएका थिए । 

स्रोतहरूका अनुसार विद्युत् प्राधिकरणका पूर्व निर्देशक कुलमान घिसिङ, काठमाडौं महानगरपालिकाका पूर्व कानुनी सल्लाहकार ओमप्रकाश अर्याल र पूर्व सैनिक लगायतलाई मन्त्रीमा पठाउने शुक्रबारको तयारी थियो । तर केही समय अध्ययन र छलफल गर्ने भन्दै रोकिएको थियो । 

अहिले अर्याल र गुरुङको मन्त्री बन्ने सम्भावना कम रहेको जेनजीहरु बताउँछन् । अर्याल प्रधानमन्त्री कार्कीको सल्लाहकार बन्ने चर्चा छ ।