काठमाडौं – दक्षिण अफ्रिकाले आईसीसी विश्व टेस्ट च्याम्पियनसिपको उपाधि जितेको छ । लर्ड्समा भएको फाइनलमा अष्ट्रेलियालाई पाँच विकेटले पराजित गर्दै दक्षिण अफ्रिकाले २७ वर्षदेखिको आईसीसी ट्रफीको खडेरी अन्त्य गरेको हाे।

एडन मारक्रमको १३६ रनको शतकीय इनिङ्स र कप्तान टेम्बा बवूमाको ६६ रनको संघर्षपूर्ण पारीले अफ्रिकालाई ऐतिहासिक जित दिलायो।

दक्षिण अफ्रिकाले सन् १९९८ मा आईसीसी नक्कआउट ट्रफी (हालको च्याम्पियन्स ट्रफी) जितेको थियो। त्यसपछि लामो समयसम्म कुनै आईसीसी उपाधि हात पार्न नसक्दा टिमलाई ‘चोकर्स’ को उपनाम दिइएको थियो। तर, यस पटकको जितले उक्त ट्याग पनि हटाएको छ ।

पहिलो इनिङमा शून्य रनमा आउट भएका मारक्रमले दोस्रो इनिङमा संयमित तर आक्रामक पारी खेल्दै टिमलाई जित नजिक पुर्‍याएका थिए । १३६ रनको योगदान दिए पनि उनी अन्त्यतिर छक्का हान्ने प्रयासमा हेजलवुडको बलमा हेडद्वारा क्याच आउट भए।

त्यसबेलासम्म अफ्रिकालाई जितका लागि केवल ६ रन आवश्यक थियो। मारक्रम ‘प्लेयर अफ द म्याच’ घोषित भए।

कप्तान बवूमाले हैमस्ट्रिङको चोटका बाबजुद मैदान छाडेनन्। उनले ६६ रन बनाए, जसमा ३९ रन चोट लागेपछि दौडेर बनाएका थिए।

हैमस्ट्रिङले मारक्रमसँग तेस्रो विकेटका लागि गरेको १४७ रनको साझेदारीले जितको बलियो आधार तयार गरेका थियो।

बलिङतर्फ कगिसो रबाडाले टेस्ट क्रिकेटमा आफ्नो उत्कृष्ट प्रदर्शन गर्दै ९ विकेट लिए। उनले पहिलो इनिङमा ५१ रनमा ५ विकेट र दोस्रो इनिङमा ५२ रनमा ४ विकेट लिए। योसँगै उनी अहिले लर्ड्स मैदानमा सबैभन्दा धेरै विकेट(२२ विकेट) लिने अफ्रिकन बलर बनेका छन् ।