काठमाडौं – नेपाली राष्ट्रिय महिला फुटबल टोलीकी खेलाडी रेखा पौडेल सम्मिलित अबुधाबी कन्ट्री क्लबले यूएई महिला लिग प्रथम डिभिजनको उपाधि जितेको छ।

अबुधाबी कन्ट्री क्लबले ७ खेलमध्ये सबै जितेर अपराजित रहँदै २१ अंकसहित उपाधि कब्जा गरेको हो। टोलीले प्रतियोगिता अवधिभर ३३ गोल गर्दै एक पनि गोल खाएन् ।

यो अबुधाबीको लगातार ११औं उपाधि हो । उपाधि जितेपछि उनले सामाजिक सञ्जालमा ट्रफीसहितका तस्वीर र भिडियोहरू साझा गरेकी छन्।

क्लबसँगको सफल यात्रा सम्पन्न भएपछि रेखा अब केही दिनमै नेपाल फर्किनेछिन्। उनी राष्ट्रिय टोलीको क्याम्पमा सहभागी हुँदै एएफसी महिला एसियन कप २०२६ छनोटको तयारीमा जुट्नेछिन्।

उक्त प्रतियोगिताको छनोट खेलहरू आगामी जुन २९ देखि उज्बेकिस्तानमा सुरु हुँदैछन् । जसका लागि नेपाली टोली हाल प्रशिक्षणमा व्यस्त छ।