काठमाडौं – बलोचिस्तानका एक जना प्रभावशाली नेताले पाकिस्तानबाट आफ्नो क्षेत्रलाई स्वतन्त्रता दिलाइदिन भारतसमक्ष माग गरेका छन् । सामाजिक सञ्जाल एक्समा पोस्ट गर्दै बलोच नेता मिर यार बलोचले बुधबार भारतसमक्ष पाकिस्तानको कब्जाबाट बलोचिस्तानलाई मुक्त गरिदिन आग्रह गरेका हुन् ।

पाकिस्तानले बलोचिस्तानमा दशकौँदेखि हिंसा, जबरजस्ती बेपत्ता र मानवअधिकार उल्लङ्घनका घटना गराउँदै आएको बताए । बलोच जनतालाई आफ्नो राष्ट्रिय निर्णय लिन सडकमा ओर्लिन पनि उनले आह्वान गरे ।

उनले भारतलगायत विभिन्न अन्तर्राष्ट्रिय संघसंस्थालाई समेत सहयोगको अपिल गरेका छन् । भारत र पाकिस्तानबीच सैन्य टकराव थामिएपछि बलोच नेताको यस्तो आह्वान सार्वजनिक भएको हो । पाकिस्तानले लामो समयदेखि भारतको उक्साहटमा बलोचिस्तानमा पृथकतावादी गतिविधि हुने गरेको आरोप लगाउँदै आएको छ ।