काठमाडौं – वि.सं २०८० को नयाँ वर्षका अवसरमा फिल्म जारी प्रदर्शनमा आयो । यही फिल्मबाट कवि उपेन्द्र सुब्बाले निर्देशनमा डेब्यू गरे । फिल्मको निर्माता भने निर्देशक रामबाबु गुरुङ थिए ।

उपेन्द्र र रामबाबुको फिल्म सहकार्य हिट सिरिज ‘कबड्डी’बाट सुरु भएको हो । ‘जारी‘ बक्स अफिसमा सफल भएपछि उनीहरूको सम्बन्धमा चिसो पस्यो ।

गसिपअनुसार यी दुईको सम्बन्ध जारीको मुनाफालाई लिएर भएको हो । तथापि दुवैले सार्वजनिक रुपमा एक-अर्काप्रति टिप्पणी गरेनन् ।

सम्बन्धमा चिसो भने पसेकै हो । उनीहरू छुट्टिएर छुट्टाछुट्टै फिल्म पनि बनाए । रामबाबुले फिल्म ‘डिग्री माइला’ बनाए । उपेन्द्रले ‘मनसरा’ बनाए ।

यो पनि : भएकै हो त रामबाबु र उपेन्द्रको पुनर्मिलन ?

दुवैको फिल्म व्यापारिकरुपमा अपेक्षित चलेनन् । ०८१ मङ्सिरमा यी दुईको सम्बन्धमा सुधार भयो । अहिले उनीहरू सहकार्यका लागि तयार भएका छन् ।

रोचक कुरा त के छ भने- यी दुईको सम्बन्ध जुन फिल्मले चिसियो, त्यही फिल्मको सिक्वेलले उनीहरूलाई फेरि सहकार्य गराएको छ ।

नयाँ वर्ष ०८२ को अवसर पारेर उपेन्द्र सुब्बाले ‘जारी-२’ निर्माणको घोषणा गरेका छन् । यस फिल्मको लेखक र निर्देशक उपेन्द्र हुन् भने निर्माता रामबाबु गुरुङ हुन् ।

रामबाबुको ब्यानर बाँसुरी र उपेन्द्रको ब्यानर ‘कबड्डी फिल्मस्’ को सहकार्यमा नै यो फिल्म बन्ने भएको हो ।

उपेन्द्रले फिल्मको फर्स्टलुक सार्वजनिक गरी फिल्म निर्माणबारे जानकारी दिएका हुन् । यो पोस्टरमा नायक दयाहाङ राईले च्याब्रुङ बजाउँदै गरेको देख्न सकिन्छ ।

वैशाख तेस्रो साताबाट छायाङ्कन सुरु हुने भनिएको यस फिल्मको केन्द्रीय भूमिकामा नायक दयाहाङसहित विजय बराल र मिरुना मगर रहने बताइएको छ ।

उनीहरूसहित फिल्ममा नायिका ऋचा शर्मा, बुद्धि तामाङ, पुष्कर गुरुङ, माओत्से गुरुङ, कमलमणि नेपाल, अनिल सुब्बा, रेखा लिम्बू, वेदना राई र सिर्जना निङ्लेखुको अभिनय रहने बताइएको छ ।

यस फिल्मको स्लोगन ‘सङ अफ च्याब्रुङ’ राखिएको छ । फिल्मको छायाङ्कन पाँचथरको विभिन्न स्थानमा हुने बताइएको छ । आगामी दसैँलाई लक्षित गरी फिल्म प्रदर्शनमा ल्याउने तयारीमा निर्माणपक्ष रहेको बुझिएको छ ।