काठमाडौं- शुक्रबारदेखि काठमाडौंमा हिमवत्खण्ड कला–साहित्य–संस्कृति सम्मिलन सुरू भएको छ। हिमवत्खण्डमा छरिएर रहेका नेपाली भावनालाई समेट्ने प्रयासस्वरूप मदन भण्डारी कला–साहित्य प्रतिष्ठानले सम्मिलन आयोजना गरेको हो ।

सम्मिलन सुरू हुनुअघि विभिन्न जातजाति र समुदायको संस्कृति झल्किने गरी झाँकी र र्‍याली आयोजना गरिएको छ। उक्त र्‍यालीमा विभिन्न मौलिक पोशाकमा सजिएर सहभागीहरू आएका थिए ।

यो कार्य्रकममा प्राज्ञ डा. जगमान गुरुङद्वारा ‘हिमवत्खण्डको सांस्कृतिक वैशिष्ट्य’ का सम्बन्धमा र सिक्किमका पूर्वमुख्यमन्त्री तथा वरिष्ठ साहित्यकार पवन चाम्लिङद्वारा ‘हिमवत्खण्डमा नेपाली भाषा तथा नेपाली लोकसंस्कृतिको अवस्था’ बारे विशेष प्रवचन राखिएको छ ।

प्रतिष्ठानका अध्यक्ष तथा सम्मिलन आयोजक समितिका संयोजक डा. विजय सुब्बाका अनुसार हिमवत्खण्ड क्षेत्रका भाषाभाषीका विभिन्न संस्कृति, सभ्यता र ज्ञानपरम्परालाई आत्मसाथ् गर्दै यो सम्मिलन आयोजना गरिएको हो ।

सम्मिलनमा यहाँका विविध जातजाति तथा समुदायबीच सांस्कृतिक सन्देश आदानप्रदान गर्ने, संस्कृति, सभ्यता र ज्ञानपरम्पराबारे प्राज्ञिक विमर्श गरिँदैछ ।

डा. सुब्बाका अनुसार सम्मिलनमा मुलुकका सातै प्रदेशका साथै भारत (सिक्किम, पश्चिम बङ्गाल, असम, मणिपुर, मेघालय, उत्तराञ्चल), चीन, बङ्गलादेश, म्यान्मार, भुटान, थाइल्यान्डबाट नेपाली लोकसंस्कृतिसम्बन्धी कार्यपत्र प्रस्तुत गरिने छ । सम्मिलनमा प्रधानमन्त्री केपी शर्मा ओलीले ‘हिमवत्खण्ड, यसको महिमा र लोकसंस्कृति’ का सम्बन्धमा प्रवचन दिने भएका छन् ।

सम्मिलनमा प्रा.डा. चूडामणि बन्धुद्वारा हिमवत्खण्डमा नेपाली भाषाको अवस्था, डा. रमेश ढुङ्गेलद्वारा हिमवत्खण्डको संस्कृति र विश्वव्यापीकरण एवं डा. भेषराज अधिकारीद्वारा हिमवत्खण्डको नेपाली खानपान संस्कृतिसम्बन्धी कार्यपत्र प्रस्तुत हुँदैछ ।

डा. सुब्बाले सम्मिलनमा नेपाली चलचित्रमा भाषा र नेपाली छापा माध्यमको भाषा सम्बन्धमा समेत समूह छलफल गरिने बताएका छन्।