काठमाडौं– नायक पल शाह केन्द्रीय भूमिकाका लागि तय भएको फिल्म ‘महाराजधिराज’को फ्रस्टलुक पोस्टर सार्वजनिक गरिएको छ ।

पोस्टरमा पल शाहलाई दोहोरो चरित्रमा देख्न सकिन्छ । एक तस्बिरमा उनी राजर्षि पहिरनमा छन् । उनले टाउकोमा श्रीपेच, हातमा बोकेको राजदण्ड र पहिरनले पलले राजा भूमिका रहेको संकेत गर्छ ।

अर्को तस्बिरमा पल नग्न अवस्थामा छन् । उनी पातलो र शारीरिक रुपमा कमजोर देखिन्छन् । ती पतला पात्र ‘भिन्जेट’ कुर्सीमा बसेका छन् भने उनको पछाडि राजाको पहिरानमा रहेको पात्र उभिएका छन् ।

पोस्टर हेर्दा राजाले ती पातला व्यक्तिको सुरुक्षा दिए जस्तो देखिन्छ । पोस्टरले पल शाह फिल्ममा दोहोरो भूमिकामा रहेको संकेत गर्छ । यद्यपि निर्माण पक्षले यसबारे खुलाएको छैन ।

निर्माण पक्षले पोस्टरमार्फत् फिल्मको स्लोगन ‘अनेकौं समस्या म देख्छु जगतमा, छ कि दोष हाम्रो आफ्नै रगतमा’ रहेको खुलाएको छ ।

यही पोस्टरमामार्फत् फिल्मको प्रदर्शन मिति आगमी फूलपातीलाई तोकिएको छ । निर्माण पक्षले अन्य कलाकार र छायाङ्कनबारे विस्तारै जानकारी दिने बताएको छ ।

नायक पलले सामाजिक सञ्जालमा पोस्टर सेयर गर्दै आज विशेष दिन भएको बताएका छन् । उनले आफ्नो ११ ‌औं फिल्मको फ्रस्टलुक सार्वजनिक भएको दिन भएकाले उनले विशेष रहेको बताएका हुन् ।

उनले अगाडि लेखेका छन्, ‘हामी र हाम्रो टिम फेरि एउटा गहिरो कथा पस्किने प्रयास गर्दैछौं, जसले तपाईंहरूको हृदयको गहिराइसम्म छुनेछ।’

छत्रेश्वरी म्यानेजमेन्ट प्रा।लि।को ब्यारनमा तयार हुने यस फिल्मको लेखक र निर्देशक परिच्छेद सेन हुन् । विराज विष्ट प्रस्तुतकर्ता रहेको यस फिल्मको निर्माता टोपेन्द्र विष्ट, चक्रबहादुर केसी र रवि खड्का हुन् ।