काठमाडौं- अमेरिकी प्रविधि कम्पनी माइक्रोसफ्टले भारतमा १७ अर्ब ५० करोड अमेरिकी डलरको लगानी गर्ने भएको छ । कम्पनीका प्रमुख कार्यकारी सत्य नडेलाले भारतीय प्रधानमन्त्री नरेन्द्र मोदीसँगको भेटवार्ताका क्रममा यस्तो घोषणा गरेका हुन् ।

यो लगानी भारतमा आर्टिफिसियल इन्टिलिजेन्स एआईको क्षमता विकासमा खर्च हुने जनइएको छ । यो माइक्रोसफ्टले एशियामा गरेको हालसम्म कै सबैभन्दा ठूलो लगानी हो ।

नाडेलासँगको भेटवार्तापछि प्रधानमन्त्री मोदीले एआईको क्षेत्रमा भारतप्रति विश्वले आशा गरिरहेको जनाएका छन् । उनले यो लगानीलाई भारतका युवाहरुले अवसरका रुपमा हेरेको र एआईको नवप्रवर्तनलाई थप मजबुत बनाउने जनाएका छन् ।

यसअघि पनि माइक्रोसफ्टले भारतको बैङ्गलुरुमा तीन अर्ब डलर बराबरको लगानी गर्ने जनाएको थियो । एआई पूर्वाधार र क्लाउडको निर्माणमा आगामी दुई वर्षसम्म उक्त लगानी गरिने कम्पनीले उल्लेख गरेको छ ।