नयाँदिल्ली– अर्जेन्टिनाका महान् फुटबलर लियोनल मेसी १४ वर्षपछि भारत आएका छन् । उनीसँग उरुग्वेका स्टार फुटबलर लुइस सुआरेज र अर्जेन्टिनाका मिडफिल्डर रोद्रिगो डी पाउल पनि आएका छन् ।
तीनै खेलाडी शुक्रबार राति करिब २:३० बजे कोलकाता विमानस्थलमा पुगेका थिए । उनीहरूले बिहान ९:३० बजे प्रशंसकहरूसँग भेटेका छन् ।
मेसी संयुक्त राष्ट्रसंघको बाल संगठन युनिसेफका ब्रान्ड एम्बेसडर हुन् । त्यहीअन्तर्गत उनी भारतमा ‘गट इन्डिया’ टुर गर्दैछन्।
मेसीले १५ डिसेम्बरसम्म ३ दिनमा ४ शहरको भ्रमण गर्ने छन्। जसमा हैदराबाद, मुम्बई र नयाँ दिल्ली पनि समावेश छन् ।
कोलकातामै उनले बलिउड अभिनेता शाहरुख खान, बंगालकी मुख्यमन्त्री ममता बनर्जी र भारतीय क्रिकेट टोलीका पूर्वकप्तान सौरव गांगुलीसँग भेटेका छन् ।
यस क्रममा मुम्बईमा सचिन तेन्दुलकरसँग पनि भेट्ने कार्यक्रम छ । १५ डिसेम्बरमा प्रधानमन्त्री नरेन्द्र मोदीसँग भेटेर उनको भ्रमण समाप्त हुने छ।
१४ डिसेम्बरमा सुनील छेत्रीसँग भिड्ने
मेसी कोलकाताको युवा भारती स्टेडियममा आफ्नो ७० फिट अग्लो मूर्तिको भर्चुअल अनावरण गरेका छन् । त्यसपछि उनी शाहरुख, गांगुली र मुख्यमन्त्रीसँग भेटेका छन् । दिउँसो पौने १ बजे मैत्रीपूर्ण मैच खेल्दै छन्, त्यसपछि २ बजे हैदराबादका लागि प्रस्थान गर्ने तालिका छ ।
१३ डिसेम्बरमै हैदराबादमा मेसी मैत्रीपूर्ण फुटबल खेलसँगै संगीत समारोहमा पनि सहभागी हुने छन् ।
१४ डिसेम्बरमा मुम्बई पुग्ने उनी वानखेडे स्टेडियममा भारतका महान् खेलाडी सुनील छेत्रीविरुद्ध अर्को मैत्रीपूर्ण मैच खेल्ने छन्।
१५ डिसेम्बरमा दिल्ली पुग्ने मेसीले बिहान प्रधानमन्त्री नरेन्द्र मोदीसँग भेटेपछि दिउँसो १:३० बजे सम्मान समारोहमा सहभागी हुने छन्। त्यसपछि मेसी भारतबाट प्रस्थान गर्ने छन्।
सुआरेज र डी पाउल पनि
लुइस सुआरेज अमेरिकाको मेजर लिग सकर (एमएलएस) मा मेसीसँगै इन्टर मियामीका लागि खेल्छन्। दुवै बार्सिलोनामा पनि सँगै खेलेका थिए। दुवै निकै राम्रा साथी हुन्।
टिकटको मूल्य २२५० रुपैयाँबाट सुरु
विश्व च्याम्पियन मेसीका भारतमा धेरै प्रशंसक छन्, स्टेडियममा उनलाई हेर्न टिकटको मारामारी चलेको छ । हैदराबादको उप्पल स्टेडियममा टिकटको सुरुआती मूल्य २२५० भारतीय रुपैयाँ छ । कोलकातामा ४३६६, मुम्बईमा ७०८० र दिल्लीमा ७६७० रुपैयाँबाट टिकट मूल्य सुरु भएको छ ।
१४ वर्षपछि भारत आए
लियोनल मेसी सन् २०११ पछि पहिलो पटक भारत आएका छन् । १४ वर्षअघि मेसीले भारतमा भेनेजुएलाविरुद्ध मैत्रीपूर्ण खेलमा अर्जेन्टिनाका तर्फबाट खेलेका थिए ।
त्यतिबेला कोलकाताकै साल्ट लेक स्टेडियममा मेसीको उपस्थितिमा अर्जेन्टिनाले १-० ले खेल जितेको थियो ।
प्रतिक्रिया