काठमाडौं – न्यून शो र कमजोर अकुपेन्सीका साथ कात्तिक १४ गतेबाट प्रदर्शनमा आएको परान फिल्मले अनपेक्षित पिकअप लिएको छ । प्रदर्शनको चौथो दिनबाट पिकअप लिएको यो फिल्म बिहीबार १४ औँ दिनमा प्रदर्शनरत छ ।

प्रदर्शनको एक सातापछि कात्तिक २१ देखि ‘परान’ले बक्स अफिसमा ‘जारी २’सँग प्रतिस्पर्धा गरिरहेको छ ।

हिट फिल्म ‘जारी’ सिक्वेल ‘जारी २’सँगको प्रतिस्पर्धामा पनि ‘परान’ हेभिवेट निस्किएको छ । बिहीबारको हकमा ‘जारी २’लाई हलहरुले छुट्याएको शो संख्याभन्दा ‘परान’को बढी छ । ‘परान’ले बिहीबार १९५ भन्दा बढी शो पाउँदा ‘जारी २’ले १३० शो मात्रै पाएको छ ।

यो पनि – समीक्षा ‘जारी २’ : कमजोर सिक्वेल !

एक सातापछि प्रदर्शनमा आएको फिल्मको भन्दा बढी शो पाउनु ‘परान’लाई दर्शकको उच्च साथ छ भन्ने सन्देश हो । बुकिङमा पनि ‘परान’को अकुपेन्सी उच्च देखिन्छ ।

‘जारी २’ले प्रदर्शनको पहिलो दिन २५८ शो पाएको थियो । दयनीय ५८ शो पाएर प्रदर्शनमा आएको ‘परान’ले दर्शकबाट सकारात्मक ‘वर्ड अफ माउथ’ पाएपछि हलमा चाप बढेको हो ।

यो पनि – समीक्षा : परान भरिएको ‘परान’

१४औँ दिनमा आइपुग्दा ‘परान’को शो प्रदर्शनको पहिलो दिनको भन्दा तेब्बरले बढी छ । पछिल्लो केही दिनयता ‘परान’ले ‘जारी २’को शो खोसेको पाइन्छ ।

‘जारी २’मा नायकहरु दयाहाङ राई, विजय बराल र नायिका मिरुना मगर शीर्ष भूमिकामा छन् । यसको लेखक तथा निर्देशक उपेन्द्र सुब्बा हुन् ।

‘परान’मा नीर शाहको शीर्ष भूमिका रहेको छ । यसको निर्देशक दीपक आर्चाय ‘काकु’ हुन् । परान आचार्यकै कथा हो भने पटकथा यम थापाले लेखेका हुन् ।