काठमाडौं – इजरायली संसद्‍मै अमेरिकी राष्ट्रपति डोनाल्ड ट्रम्पले विरोधको सामना गर्नुपरेको छ। त्यहाँका प्रधानमन्त्री बेन्जामिन नेतान्याहूले बोलिसकेपछि रोस्ट्रममा पुगेका ट्रम्पले सम्बोधन थाल्नेबित्तिकै विरोधको सामना गर्नुपरेको हो।

गाजामा दुई वर्षसम्म चलेको नरसंहारसिहतको युद्धलाई उल्लेख गर्दै ट्रम्पले यो क्षेत्र अहिले शान्त रहेको जिकिर गरे । उनले यहाँ सधैँ शान्ति कायम हुने बताए ।

तर ट्रम्पको सम्बोधनका क्रममा इजरायली संसद्मा केही तनाव भयो । त्यहीकारण ट्रम्पले केही समयलाई सम्बोधन नै रोक्न बाध्य भए ।

ट्रम्पको केनेस्सेट (इजरायली संसद) मा गरिएको भाषण विरोधका कारण केही समयका लागि रोक्नु पर्‍यो । ट्रम्पको भाषण नै रोकेर प्यालेस्टाइनको पक्षमा आवाज उठाउने व्यक्ति सांसद ऐमन ओदेह रहेको खुलेको छ ।

भाषणअघि नै ओदेहले आफ्नो एक्स ह्यान्डलमा लेखेका थिए, ‘संसद्को प्लेनरीमा देखिएको कपटको स्तर असह्य छ। नेतन्याहूलाई प्रशंसा र चाकरीमार्फत् राजा बनाउने प्रयासले गाजामा भएका मानवताविरुद्धका अपराधहरू र सयौँ हजार प्यालेस्टिनी र हजारौं इजरायलीको रगतको जिम्मेवारीबाट उनलाई र उनको सरकारलाई मुक्त गर्न सक्दैन।’

उनले अझै विरोध जनाउँदै लेखेका थिए । ‘तर युद्धविराम र समग्र सम्झौताका कारण मात्र म यहाँ उपस्थित छु। कब्जा अन्त्य गरेर र इजरायलसँगै प्यालेस्टिनी राज्यलाई मान्यता दिएर मात्रै सबैका लागि न्याय, शान्ति र सुरक्षाको मार्ग खुल्नेछ।’

भाषणका क्रममा ट्रम्पलाई केहीबेर रोक्ने गरी उनले विरोध जनाएका थिए । तर सुरक्षा अधिकारीहरूले ट्रम्पलाई अवरोध गर्ने उनीसहितका केही व्यक्तिलाई सुरक्षाकर्मीले संसद् भवनबाट बाहिर निकालेका थिए । सुरक्षाकर्मीले उनीहरूले बोकेका ब्यानर पनि खोसेका थिए ।