काठमाडौं- सन् २०२३ अक्टोबर ७ तारिखदेखि गाजास्थित विद्रोही समूह हमासको नियन्त्रणमा रहेका नेपाली युवक विपिन जोशीको अवस्थाबारे अझै प्रष्ट खुल्न नसकेको परराष्ट्र मन्त्रालयले जनाएको छ।

हमासले बन्धकमध्ये सातजनालाई पहिलो चरणमा रिहा गरिसकेको अवस्थामा नेपाली २४ वर्षीय युवक विपिनको मृत्यु भएको समाचार आइरहेका बेला परराष्ट्रले यसो भनेको हो ।

‘इजरायलस्थित नेपाली राजदूत त्यहाँको सरकार र सेनासँग नियमित सम्पर्कमै हुनु हुन्छ’, परराष्ट्र मन्त्रालयका प्रवक्ता एवम् सहसचिव लोकबहादुर चौहान क्षत्रीले खबरहबसँग भने, ‘अहिलेसम्म इजरायल सरकारले विपिन जीवित रहेको या मृत्यु भइसकेको केही खुलाएको छैन ।’

उनका अनुसार इजरायलस्थित राजदूत धनप्रसाद पण्डितलाई त्यहाँको सेनाका एक अधिकारीले विपिनको अवस्था जीवित या मृत प्रष्ट नखुलेको खबर दिएका थिए ।

‘तर हमासले रिहा गर्ने २० जना जीवितको सूचीमा विपिनको नाम नभएकाले केही संशय भने पैदा भएको छ’, उनले भने, ‘अहिले हामी इजरायली सरकारको औपचारिक सूचनाको प्रतिक्षामा छौँ । त्यहाँको सरकारले औपचारिक जानकारी नदिई यति गम्भीर विषयमा निर्णय गर्नु हतार हुन्छ ।’

यदि विपिनको मृत्यु नै भइसकेको भए पनि इजरायल सरकारको आधिकारिक सूचना कुरिरहेको उनले बताए ।

यसअघि इसरायली डिफेन्स फोर्स (आईडीएफका) एक अधिकारी नेपाली विद्यार्थी विपिन जोशी जीवित नरहेको जानकारी दिएको समाचार भाइरल भएको थियो । आईडीएफले विपिनको परिवार र इजरायलस्थित नेपाली दूतावासलाई यो जानकारी दिएको बताइए पनि विपिनका बुवाले नै यसलाई अस्वीकार गरेका छन् ।