काठमाडौँ – शंकास्पद कागजात लिएर जेन-जी प्रदर्शनको मौका छोपी जेलबाट बाहिर निस्किएका रवि लामिछाने फेरि जेल फर्कने भएका छन्‌ । लामिछाने सहकारी ठगीमा अदालतको आदेशले पुर्पक्षमा बसिरहेका कैदी हुन्‌ ।

गत मङ्गबार (भदौ २६ गते) जेन-जी प्रदर्शन क्रममा पार्टीकै नेताहरू सङ्लग्न भीडले नख्खु कारागार घेरेको मौका छोपी लामिछाने जेलबाट हिँडेका थिए ।

लामिछानेले जेलबाट निस्किएपछि २६ कारागार र सुधार गृहहरूमा तोडफोड गर्दै झण्डै १५ हजार कैदीबन्दी भागेका थिए ।

नागरिक तहबाट चर्को आलोचना भएपछि र नख्खु कारागार प्रशासनले तत्काल सम्पर्कमा आउन निर्देशन दिएपछि लामिछाने जेल फर्कन लागेका हुन्‌ । फरार भएका कैदीबन्दीलाई सम्पर्कमा आउन नख्खु कारागार प्रशासनले शुक्रबार सूचना जारी गरेको थियो ।

जन्मदिन काराबासमै !

लामिछानेले शनिबार परेको जन्मदिनको अवसरमै आफू नख्खु कारागार जान लागेको बताएका छन्‌ ।

‘संयोगले आज मेरो जन्मदिन परेछ । म आफूलाई जन्मदिनको उपहारस्वरूप फेरि कारागारमा पठाउँदैछु,’ फेसबुकमा भिडियो अपलोड गर्दै रविले भनेका छन् । पछिल्लो सरकारले आफूमाथि चरम राजनीतिक प्रतिशोध साँधेर आफ्ने ‘जिना हराम’ गरेको पनि उनको गुनासो छ ।

सर्वोच्च अदालतकी पूर्वप्रधानन्यायाधीश सुशीला कार्की अन्तरिम सरकारको प्रधानमन्त्री नियुक्त भएपछि अब आफूमाथि अन्याय नहुने आशासहित कारागार जान लागेको उनले तर्क गरेका छन्‌ ।

‘आज यस देशको नेतृत्वमा न्यायकी प्रतिमूर्ति स्वयम्‌ प्रधानमन्त्री बन्नुभएको छ। अब चाहिँ अन्याय हुन्न भन्ने आशासहित म कारागार जाँदैछु,’ उनले भिडियोमा भनेका छन् ।

यसअघि उनी आफू सचिवस्तरीय निर्णयबाट कारागारबाट बाहिर निस्किएको दाबी गरिरहेका थिए । तर, कारागार प्रशासनले भने हुलहुज्जतको स्थिति निम्त्याइ तत्कालै कागज बनाउन लगाइ लामिछाने जेलबाट गएको बताइसकेको छ ।

नेपाली कांग्रेसको भ्रातृ संगठन नेपाल विद्यार्थी संघ (नेविसंघ)ले काठमाडौंका विभिन्न ठाउँका पर्खालमा ‘कैदी भागेको सूचना’ भन्दै रविको तस्बिर टाँस्ने अभियान चलाएका छन्‌ ।