काठमाडौं– पाकिस्तानका रक्षामन्त्री ख्वाजा आशिफले आफ्नो मुलुकको कर्मचारीतन्त्रको चर्को आलोचना गरेका छन् । उनले पाकिस्तानी कर्मचारीतन्त्रका आधाभन्दा धेरै सदस्यले पोर्चुगलमा घरजग्गा खरिद गरेको दाबी गरेका छन् ।

उनले विदेशमा सम्पत्ति जोड्नेहरुले पाकिस्तानको नागरिकता त्याग्न समेत तयार रहेको आरोप लगाए । द न्यूज पाकिस्तानका अनुसार आशिफले आफ्नो मुलुकमा धेरै नाम चलेका कर्मचारीले समेत विदेशमा सम्पत्ति किनेको दाबी गरेका छन् ।

भ्रष्टाचारबाट पाकिस्तानमा कमाएको अकुत सम्पत्ति विदेशमा लगानी गरी कर्मचारीहरुले सहज रिटायरको योजना बनाएको पनि आशिफको आरोप छ । राजनीतिक नेताहरुले विदेशमा कुनै सम्पत्ति नजोड्ने र विदेशी नागरिकताको अपेक्षा पनि नगर्ने उनको दाबी छ ।

उनले कतिपय अवस्थामा सरकार र राजनीतिक नेताहरु नै कर्मचारीतन्त्रको भरमा चल्नुपरेको विडम्बना पनि सुनाए । उनले कर्मचारीहरुको यस्तो व्यवहारलाई ‘शर्मनाक’ को संज्ञा दिँदै उनीहरुले देशको माटो प्रदूषित गरिरहेको टिप्पणी गरे ।