काठमाडौं – दीपेन्द्र लामाको निर्देशनमा फिल्म ‘मुनामदनको ब्रेकअप’ बन्ने भएको छ । निर्माण पक्षले आइतबार फिल्म निर्माणको घोषणा गरेको हो ।

निर्देशक लामाका अनुसार यस फिल्मको नायकमा राज कटुवाल फाइनल भएका छन् । राज गत जेठ ९ मा प्रदर्शनमा आएको फिल्म ‘नरसिंहा ः अभतार’का नायकसमेत हुन् ।

अन्य कलाकार चयनको काम भने बाँकी रहेको निर्देशक दीपेन्द्रले बताए । उनले भने, ‘पटकथामा सुनाउने कलाकार भेटेर राजलाई अनुबन्ध गरिहाल्यौँ। बाँकी कलाकार अब चाँडै अनुबन्ध गर्नेछौँ ।’

निर्देशक लामा गत वर्ष प्रदर्शनमा आएको फिल्म ‘दुःखी आत्मा’ निर्देशक र लेखक हुन् । जुन फिल्म व्यापारिक रुपमा फ्लप भएको थियो । त्यसको लाइफटाइमा ग्रस कलेक्सन ७१ लाख २७ लाख मात्रै छ ।

यस फिल्मका लेखक सामिप्यराज तिम्लसेना हुन् । उनका अनुसार यो फिल्म ग्रामिण प्रेमकथामा आधारित छ ।

कथाबारे उनी थप्छन्, ‘पछिल्लो समय नेपाली फिल्ममा देखिएको भन्दा फरक स्वभावको कथा हो यो ।’

दीपेन्द्र र सामिप्यको यो दोस्रो सहकार्य हुन् । यसअघि उनीहरुले पहिलो सहकार्य फिल्म ‘गोपी’मा भएको थियो । ‘गोपी’ ०७५ सालमा प्रदर्शनमा आएको थियो ।

नायक विपीन कार्की आफ्‍नो करिअरको उत्कृष्ट मध्येको एक फिल्म ‘गोपी’लाई मान्छन् ।

दीपेन्द्र र सामिप्य दुवै पत्रकारिता पृष्ठभूमिका हुन् । सात वर्षपछि फेरि उनीहरुको सहकार्य हुन लागेको हो । ‘मुनामदनको ब्रेकअप’ दीपेन्द्रको निर्देशन रहने सातौं फिल्म हो ।