धनगढी। कैलालीको धनगढीमा जारी राष्ट्रिय युवा सङ्घ कप भलिबल प्रतियोगिता २०८१ मा चार टिम सेमिफाइनलमा पुगेका छन् । प्रतियोगितामा सहभागी टिम अछाम र ऐश्वर्य बहुमुखी क्याम्पस बाहिरिएसँगै सेमिफाइनल पुग्ने चार टिमको टुङ्गो लागेको हो ।

शाह पोल्ट्री फर्म, राना थारु आदर्श युवा क्लब , टिम मालिकार्जुन र राष्ट्रिय युवा सङ्घ डोटी सेमिफाइनलमा पुगेका हुन् । भोली सेमिफाइनलका सबै खेल हुने छन् । राष्ट्रिय युवा सङ्घ नेपाल सुदूरपश्चिम प्रदेश कमिटीले चैत २९ गतेदेखि आयोजना गरेको खुल्ला पुरुष भलिबल प्रतियोगिताको फाइनल वैशाख २ गते हुने छ ।

प्रतियोगितामा पहिलो हुने टिमले दुई लाख २५ हजार, दोस्रो हुनेले एक लाख २५ हजार र तेस्रो हुने टिमलाई ७५ हजार नगद पुरस्कार, ट्रफि, मेडल र प्रमाण पत्र प्रदान गरिने युवा सङ्घले जनाएको छ । नेकपा एमाले महासचिव शङ्कर पोख्रेलले उद्घाटन गरेको भलिबल प्रतियोगिताको समापन वैशाख २ गते उद्योग वाणिज्य तथा आपुर्ति मन्त्री दामोदर भण्डारीले गर्ने छन् ।

पछिल्लो समय समाजमा बढिरहेको लागू पदार्थ दुर्व्यसनी रोक्न सचेतना फैलाउने उद्देश्यले भलिबल प्रतियोगिता आयोजना गरिएको राष्ट्रिय युवा सङ्घ नेपाल सुदूरपश्चिम प्रदेश कमिटी अध्यक्ष अरुण कुवरले जानकारी दिए ।