पोखरा – १९ औं पोखरा अन्तर्राष्ट्रिय म्याराथन २०८१ मा २१ देशका १० हजार धावक दौडने भएका छन्। नेपाल भूतपूर्व खेलाडी मञ्चका अध्यक्ष दिलबहादुर गुरूङका अनुसार खुला म्याराथन (४२.१९५ किमी) मा २१ देशका ८० विदेशीसहित १ सय ५० जनाले भाग लिनेछन्। हाफ म्याराथन (२१.०९७ किमी) पुरुष र महिलातर्फ गरी १ सय ५० जना खेलाडी सहभागी हुनेछन्।

१० किमी दौडमा ४ सय २०, ५ किमी भेट्रान्सतर्फ ६० तथा छात्र/छात्रातर्फ २ हजार ४९५ जनाले नाम दर्ता गराएका छन्। ‘रन फर फन’ मा करिब ७ हजार सहभागी हुनेछन्।

फागुन ३ गते पोखरा रंगशालाबाट सुरु हुने म्याराथनका विजेताले ५ लाख रुपैयाँ पुरस्कार पाउने छन्। कुल २१ लाख ३४ हजार नगद पुरस्कार प्रदान गरिनेछ। प्रतियोगिता उद्घाटन उपप्रधान तथा अर्थमन्त्री विष्णु पौडेलले गर्ने कार्यक्रम छ।

पोखरा म्याराथनलाई अन्तर्राष्ट्रिय छाता संस्था ‘एम्स’मा दर्ता गरिसकिएको छ। सफल दूधले म्याराथनको मुख्य प्रायोजन गरेको छ। मञ्चले पोखरामा दौड संस्कृतिको विकासका लागि साप्ताहिक तथा मासिक दौड आयोजना गर्ने जनाएको छ।