लण्डन- इङ्लिस प्रिमियर लिगअन्तर्गत गएराति एभर्टनसँग २-२ को बराबरीमा सकिएको खेलमा मैदानमै रातो कार्ड खाएका लिभरपुलका प्रशिक्षक आर्न स्लटलाई दुई खेलको प्रतिबन्ध लागेको छ ।

एभर्टनले खेलको अतिरिक्त समयको सातौँ मिनेटमा बराबरी गोल गरेपछि मैदानमा तनाव भएको थियो । चारवटा रातो कार्ड प्रयोग भएको उक्त खेलमा लिभरपुलका प्रशिक्षक स्लटले मैदानमै प्रशिक्षकसँग सवाल-जवाफ गरेका थिए ।

त्यसपछि प्रिमियर लिगले आर्न स्लटलाई अबका दुई खेलमा टच लाइन प्रतिबन्ध लगाएको हो । अबका दुई खेलमा स्लटले मैदानको टच लाइनमा उत्रिएर खेलाडीलाई निर्देशन दिन पाउने छैनन् । उनलाई स्टेडियम प्रवेशमा भने प्रतिबन्ध लागेको छैन । उनले अबका दुई खेल बेन्चमै बिताउनुपर्ने भएको छ ।

स्लटलाई रेफ्रीमाथि आक्रमक रुपमा प्रस्तुत भएर बेइज्जत गर्न खोजेको र आपत्तिजनक भाषा प्रयोग गरेको आरोप लागेको छ ।

प्रिमियर लिगको शीर्ष स्थानमा रहेको लिभरपुलका प्रशिक्षकलाई यसै सिजन लागेको प्रतिबन्ध यो पहिलो होइन । यसअघि पनि उनले टच लाइन प्रतिबन्ध भोगिसकेका छन् ।

यी डच नागरिकलाई काराबाओ कपअन्तर्गत साउथह्याप्टनविरुद्धको खेलमा पनि प्रतिबन्ध लागेको थियो । उनले यो सिजन यसअघि नै तीनवटा पहेंलो कार्ड भेटिसकेका छन् ।