काठमाडौं – मोनाकोमाथि १-० को अवे जित दर्ता गर्दै बेनफिकाले युरोपेली च्याम्पियन्स लिग फुटबलको दोस्रो चरण प्रवेशको प्ले अफमा बलियो पकड बनाएको छ।

पहिलो हाफ गोलरहित बराबरीमा सकिएको खेलको ४८ औँ मिनेटमा भेनेडियस पाब्लीडियासको गोलमा भ्रमणकारी टोलीले अग्रता लिएको थियो। त्यही अग्रता निर्णायक बन्दा बेनफिकाले १-० को जित दर्ता गरेको हो । खेलको ५२ औं मिनेटमा नै मोनाको १० खेलाडीमा सीमित भएपछि कमब्याक गर्न सकेको थिएन।

डेब्यु खेलमा दोहोरो पहेँलो कार्ड पाएका मोयताम अल मसरातीले ५२ औं मिनेटमै मैदान छोड्नु परेको थियो। उनले पहिलो खेलमै दोस्रो पहेँलो कार्ड स्वरूप रातो कार्ड पाएका हुन्।

दोस्रो लेग आउँदो मंगलबार लिस्बनमा हुनेछ। सो खेलमा चोट बोकेका एन्जल डी मारियाको अभाव भने बेनफिकाले महसुस गर्ने छ।