काठमाडौं- आफ्ना सहपाठीलाई जबरजस्ती बेपत्ता पारिएको भन्दै पाकिस्तानको बलोचिस्तान प्रान्तस्थित तुर्बत शहरमा रहेको विश्वविद्यालयमा विद्यार्थीले प्रदर्शन गरेका छन् । सो विश्वविद्यालयका तीन जना विद्यार्थी बेपत्ता पारिएका छन् ।

बलोचिस्तान पोस्टका अनुसार उक्त विश्वविद्यालयमा अध्ययन गर्ने नूर खान नजर, रहमत हाल्को र इमरान ताजको अवस्था अज्ञात रहेको जनाइएको छ । प्रदर्शनकारीले आफ्ना सहपाठीलाई तत्काल रिहा गर्न माग राख्दै नारा लेखिएका प्लेकार्ड प्रदर्शन गरेका हुन् ।

प्रदर्शनकारी विद्यार्थीका अनुसार नूर खान नजर गत डिसेम्बर ६ देखि बेपत्ता छन् । त्यसैगरी, रहमत हाल्को अक्टोबर ५ देखि र इमरान ताज गत जुन २१ देखि बेपत्ता छन् ।

सरकारी पक्षबाट उनीहरुबारे कुनै जानकारी प्राप्त नभएको जनाइएको छ । लामो समयदेखि बेपत्ता पारिँदा उनीहरुको परिवारमा तनाव र चिन्ता बढेको पोस्टले उल्लेख गरेको छ ।