काठमाडौं- बेलायतबाट चोरी भएका ४० हजार आइफोन चीन पुगेको खुलासा भएको छ । बीबीसीका अनुसार गत वर्षमात्रै बेलायतबाट चोरी भएका ४० हजार आइफोन चीन पुगेको थियो ।

प्रहरीले बेलायतबाट आइफोन चोरी गरी चीन पुर्‍याउने गतिविधिमा सक्रिय अन्तर्राष्ट्रिय गिरोहको पर्दाफास गरेसँगै यस घटनाबारे तथ्य सार्वजनिक भएको हो ।

यस अभियानलाई बेलायतमा फोन चोरी विरुद्ध गरिएको अहिलेसम्मकै सबैभन्दा ठूलो मानिएको छ । हालसम्म प्रहरीले १८ जनालाई पक्राउ गरिएको छ । त्यसबाहेक प्रहरीले दुई हजारभन्दा बढी चोरीका फोनहरू पनि बरामद गरेको बीबीसीले जनाएकोे छ ।

पक्राउ परेकाहरूमा दुई जना अफगान र एक भारतीय नागरिक पनि रहेको बीबीसीले उल्लेख गरेको छ । समाचारमा जनाइएअनुसार लन्डनमा चोरी भएका झण्डै आधा फोन विदेश लैजान यही गिरोह जिम्मेवार छ ।

गत क्रिसमसमा एक पीडितले आफ्नो चोरीको आईफोन ट्र्याक गरेकी थिइन् । उक्त फोन लण्डनको हिथ्रो विमानस्थल नजिकैको गोदाममा फेला परेपछि अनुसन्धान सुरु भएको थियो ।

सुरक्षाकर्मीहरूले अनुसन्धानका क्रममा उक्त स्थानमा पीडितको सहित ८ सय ९४ अन्य फोनहरू पनि फेला पारेका थिए । अनुसन्धानमा ती सबै फोनहरू चोरी भएको र हङकङका लागि पठाउने तयारी भइरहेको पत्ता लगाएको थियो ।