काठमाडौं- पाकिस्तानमा सञ्चारकर्मीहरु दिनप्रतिदिन असुरक्षित बन्दै जान थालेका छन् । हालैमात्र मिरपुरमा एक जना पाकिस्तानी पत्रकारको हत्या भएको छ ।

आफ्ना केटाकेटीलाई विद्यालय लैजादै गर्दा पत्रकार तुफैल अहमद रिन्दको हत्या भएको हो । उनलाई अज्ञात बन्दुकधारीले गोली प्रहार गरेका थिए ।

गोली लागेपछि घटनास्थलमै उनको ज्यान गएको कश्मीर ब्रेकिङ न्यूजले उल्लेख गरेको छ । यद्यपि घटनामा उनका सन्तानलाई भने केही नभएको एआरवाई न्यूजले उल्लेख गरेको छ ।

उनको शवलाई पोस्टमार्टमका लागि मिरपुर माथेले अस्पतालमा लगिएको छ । पत्रकारहरुले उनको हत्याको निन्दा गर्दै दोषीलाई कारवाही गर्न माग गरेका छन् ।

पाकिस्तानलाई पत्रकारका लागि सबैभन्दा असुरक्षित मुलुकमध्ये एक मानिन्छ । पछिल्लो समय पाकिस्तानमा पत्रकारहरु भयको वातावरणमा काम गर्न बाध्य रहेको अन्तर्राष्ट्रिय सञ्चार माध्यमले जनाएका छन् ।