काठमाडौं– कतार र भारतले स्वतन्त्र व्यापार सम्झौताबारे छलफल थाल्ने भएका छन् । यसका लागि छलफलको प्रारुपलाई अन्तिम रुप दिने काम भइरहेको छ ।

भारतका उद्योग वाणिज्यमन्त्री पियूष गोयलले दुई मुलुकबीच सन् २०२६ को तेस्रो त्रैमासमा स्वतन्त्र व्यापार सम्झौता भइसक्ने अपेक्षा गरिएको बताएका छन् ।

कतार भ्रमणका क्रममा मन्त्री गोयलले यस्तो जानकारी दिएको बिजनेश टुडेले जनाएको छ । कतार भारतको महत्वपूर्ण व्यापारिक साझेदार मुलुक हो । सन् २०२४–२५ मा दुई देशबीच १४ अर्ब १५ करोड डलर बराबरको व्यापार भएको थियो ।

भारतले कतारबाट प्राकृतिक ग्यास, प्रोपेन, ब्यूटेन, मलखाद प्लास्टिकजस्ता सामग्री आयात गर्छ भने कतारतर्फ औद्योगिक सामग्री, खाद्यान्न, रत्न तथा आभूषणजस्ता वस्तु निर्यात गर्छ । मन्त्री गोयलले सन् २०३० सम्म कतार र भारतबीचको व्यापारलाई १५ अर्बबाट ३० अर्ब डलरमा विस्तार गर्ने तयारी भइरहेको जनाएका छन् ।

भारतले मध्यपूर्वको अर्को मुलुक संयुक्त अरब इमिरेट्ससँग व्यापारिक सम्झौता गरिसकेको छ । यूएईको छिमेकी ओमनसँग पनि भारतले चाँडै यस्तो सम्झौता गर्ने तयारी गरिरहेको छ ।